92 yaşında velosiped sürməyə başladı, əlil arabasından xilas oldu

Böyük Britaniyada 92 yaşlı Artur Plammer velosiped sürməyə başlayaraq əlil arabasından imtina edib və yenidən yeriməyə başlayıb.

TodayPress TV xəbər verir ki, bu barədə “The Guardian” qəzeti yazıb.

Plammerin sözlərinə görə, o, 65 yaşında təqaüdə çıxıb və işlənmiş velosiped alıb. Lakin 80 yaşında həkimlər ona oynaqlarda ağrı və sərtliyə səbəb olan iltihabi xəstəlik – revmatik polimialgiya diaqnozu qoyublar. Bundan sonra kişi əlil arabasından istifadə etməyə məcbur olub.

“Mən evin qarşısındakı giriş yolunda otururdum, insanlar yanımdan keçib gedirdilər və özümü tələyə düşmüş kimi hiss edirdim”, – Plammer deyib.

Bundan sonra kişi sevdiyi velosiped sürmək məşğuliyyətinə qayıtmaq qərarına gəlib. Nəticədə ayaq əzələlərini bərpa etməyə nail olub və hazırda müstəqil şəkildə hərəkət edir. Bununla belə, Plammer həyat yoldaşı və dostlarının tempinə çatmaqda çətinlik çəkdiyini bildirib.

Mütəxəssislər 45-50 yaşdan sonra əzələ kütləsinin və gücünün ciddi şəkildə azalmasının qarşısını almaq üçün müntəzəm fiziki fəaliyyətin vacib olduğunu bildirirlər. Bu baxımdan güc məşqlərinə də laqeyd qalmamaq tövsiyə olunur.

Mütəxəssislərin sözlərinə görə, 45 yaşdan sonra əzələ kütləsini qorumaq üçün həftədə 2-3 güc məşqi kifayət edə bilər. Hər məşqin təxminən 30 dəqiqə davam etməsi tövsiyə olunur.

Qiymət Mahir