İsti suyun sağlamlıq faydaları ilə bağlı iddialar yalan çıxdı

Sosial mediada gündəlik bir fincan qatqısız isti su içməyin sağlamlığa faydalı olduğu barədə yeni trend yayılıb.

TodayPress TV xəbər verir ki, insanlar bunun arıqlamağa kömək etdiyini, dərini yaxşılaşdırdığını, menstrual sancıları azaltdığını və soyuqdəyməni müalicə etdiyini iddia etsələr də, mütəxəssislər bu fikirlərin elmi əsasının olmadığını bildirirlər.

Araşdırmalara görə, əsas faydalı amil suyun temperaturu deyil, ümumilikdə maye qəbuludur. Su böyrəklərin normal fəaliyyəti, həzm, qan dövranı və qan təzyiqinin tənzimlənməsi üçün vacibdir. Tədqiqatlar göstərir ki, susuzlaşma hətta gündəlik stress reaksiyalarını da gücləndirə bilər.

İsti suyun arıqlamağa birbaşa təsir göstərdiyini sübut edən klinik araşdırmalar mövcud deyil. Bununla belə, ümumi su istehlakının artırılması toxluq hissini gücləndirərək və şəkərli içkilərin qəbulunu azaltmaqla çəki idarəçiliyinə kömək edə bilər.

Mütəxəssislər qeyd edirlər ki, isti içkilər boğaz ağrısı və soyuqdəymə zamanı müvəqqəti rahatlıq yaratsa da, infeksiyanı müalicə etmir. Eyni zamanda “detoks effekti” ilə bağlı iddialar da təsdiqlənməyib — orqanizmi zərərli maddələrdən əsasən qaraciyər və böyrəklər təmizləyir.

Mütəxəssislərə görə, bu vərdişin populyarlaşmasının səbəbi isti içkilərin rahatlıq hissi yaratması və gündəlik sağlam ritual kimi qəbul edilməsidir. Ümumilikdə isə istənilən temperaturda kifayət qədər su içmək sağlamlıq üçün əsas amil hesab olunur.

Türkan İsgəndərli