Dəriyə ətir vurmaq sağlamlıq üçün RİSKLİDİR

Bəzi ətir komponentləri ultrabənövşəyi şüalara məruz qaldıqda dəridə təhlükəli reaksiyalara səbəb ola bilər.

TodayPress TV "Gazeta.ru"ya istinadən xəbər verir ki, bunu Rospotrebnadzorun CMD Klinikasının terapevti Yekaterina Safonova bildirib.

Onun sözlərinə görə, fotosensibilizasiyaedici maddələr ehtiva edən ətirlərin günəşə açıq dəriyə çəkilməsi UV şüalarının zərərli təsirini gücləndirə, dəri zədələnməsi və xərçəng riskini artıra bilər.

Həkim qeyd edib ki, qış aylarında da günəş şüaları təhlükəlidir. UVA şüaları ultrabənövşəyi radiasiyanın 95 faizini təşkil edir, dərinin qocalmasına və DNT zədələnməsinə səbəb olur. Qardan əks olunma isə UV şüalanmasının intensivliyini iki dəfəyədək artıra bilər.

Safonovanın sözlərinə görə, bir çox ətir tərkibi – berqamot, limon, laym kimi sitrus yağları, həmçinin səndəl ağacı və müşk – fotohəssas xüsusiyyətə malikdir. Bu maddələr UV şüaları ilə təmasda olduqda fototoksiklik, fotoallergiya, dəri yanığı, qızartı, iltihab və piqmentasiya yarada bilər. Uzunmüddətli DNT zədələnməsi isə melanoma və digər dəri xərçəngi növlərinin əsas səbəblərindən biridir.

Bununla belə, həkim vurğulayıb ki, spirt tərkibli ətirlərin istifadəsini birbaşa dəri xərçəngi riskinin artması ilə sübut edən genişmiqyaslı tədqiqatlar yoxdur. Əsas risk faktoru hələ də ultrabənövşəyi şüalanmaya xroniki və ya intensiv məruz qalmaqdır.

Mütəxəssis riskləri azaltmaq üçün günəşə çıxmazdan əvvəl açıq dəriyə ətir vurulmamasını, ətirin geyimə çəkilməsini və ya günəşdən qoruyucu kremlərdən istifadə edilməsini tövsiyə edib. Dəridə qızartı, qaşınma və ya piqmentasiya müşahidə olunarsa, həmin nahiyədə ətirdən istifadəni dayandırmaq və dermatoloqa müraciət etmək məsləhət görülür.

Jalə Rövşən 

TodayPress TV