Növbəti hədəf Litvadır?: KARTLAR AÇILDI

“Rusiya proqnozlaşdırılması mümkün olmayan dövlətdir. Hər an hər şey edə, hansısa beynəlxalq hüquqa zidd addımlar ata bilər”. 

Politoloq Elçin Xalidbəyli bunu TodayPress TV-yə danışarkən deyib. 

O qeyd edib ki, Rusiya üçün müasir dünyanın qaydaları heç bir əhəmiyyət daşımır:

“Ukrayna kimi müstəqil, suveren dövlətin ərazisində işğalçılıq fəaliyyəti ilə məşğuldur. İşğalçı savaş aparır. Rusiya hər zaman hər şey edə bilər, amma məsələ ondadır ki, buna hansı həddə qədər gücü çatacaq? Çünki Rusiyanın hədəfində sadəcə NATO ölkəsi olan Litva deyil. Artıq Qərbdə bir çoxları hesab edirlər ki, Ukrayna savaşından sonra Rusiyanın hədəfində bəzi Avropa ölkələri, xüsusilə də Şərqi Avropa ölkələri olacaq. Bu sıraya Litva, eyni zamanda Polşa kimi ölkələr də daxildir. Çünki Polşa Ukraynanın əsas dəstəkçilərindən idi və Kreml Polşadan intiqam almaq fikrində olduğunu qətiyyən gizlətmir. Ukrayna savaşı ətrafında yaranmış vəziyyəti nisbətən öz xeyrinə dəyişdiyi qənaətinə gələn Rusiya uzaq gedən planlar qurmağa başlayıb, üstəlik planları gizlətmir, tədricən gündəmə gətirir. Rusiyanın siyasi dairələri, bəzi siyasətçilər artıq açıq şəkildə bildirirlər ki, keçmiş SSRİ qeyri-qanuni şəkildə dağılıb və onun dağılma prosesi hüquqi prosedurlara zidd aparılıb. Ona görə də “keçmiş SSRİ-ni bərpa etmək lazımdır” kimi iddialar gündəmə gətirilir”.

Analitik bu baxımdan hesab edir  ki, hazırda yalnız Şərqi Avropa ölkələri və ya konkret olaraq Litva deyil, ümumilikdə MBD məkanı böyük təhlükə qarşısındadır: 

“Rusiya neoimperialist ideoloji xəttini üstün tutan dövlətdir və hələ də Çar Rusiyasının sərhədlərini xəyal edir. Hətta keçmiş SSRİ-nin sərhədləri belə Rusiyanı qane etmir. Çar Rusiyasının sərhədlərini və idarəçilik sistemini xəyal edirlər. Heç bir hüquqi subyekt istəmirlər, Kreml mərkəzli ümumi xalqların həbsxanasını yaratmaq kimi niyyətləri var. Bu baxımdan hazırda bütün MDB məkanı, yəni postsovet məkanında olan dövlətlər olduqca ciddi təhlükə qarşısındadır. Ona görə də Qərbin Ukraynaya ciddi dəstək verməsi lazımdır və Ukraynanın hərbi məğlubiyyətdən yayındırılması olduqca vacibdir. Əks halda, bütün dünya yenidən Rusiya problemi ilə üzləşə bilər. 

Qeyd edək ki, ABŞ Mərkəzi Kəşfiyyat İdarəsinin keçmiş yüksək rütbəli məmuru Devid Petreus Rusiyanın Ukraynadakı müharibədə uğur qazanacağı təqdirdə Avropadakı Baltikyanı NATO ölkəsi olan Litvaya hücum edəcəyini iddia edib.

Qiymət Mahir