Medinskinin “qardaşlıq” açıqlaması: Həqiqətə uzaq, yalan yaxın...

“Rusiya münaqişəni dini və tarixi kontekstdə təqdim etməklə məsuliyyətdən yayınmağa çalışır”.

Politoloq Aydın Quliyev bunu Rusiya prezidentinin köməkçisi Vladimir Medinskinin "The Wall Street Journal" nəşrinə müsahibəsi zamanı səsləndirdiyi fikirləri TodayPress TV-yə şərh edərkən deyib. 

O, Medinskinin Rusiya-Ukrayna müharibəsini “iki qardaş xalqın qarşıdurması” kimi qələmə verməsini səmimi bəyanat kimi qəbul etmədiyini bildirib. 

“Çünki bu yanaşma problemin əsl mahiyyətini gizlətmək, onu emosional və tarixi çalarlarla pərdələmək cəhdidir.

Medinskinin müharibəni qardaşlar arasında anlaşılmazlıq kimi təqdim etməsi həqiqətə uyğun gəlmir. Bu, dövlət maraqları və milli mənafelər uğrunda ciddi qarşıdurmadır. Məsələnin dini, etnik və ya tarixi yaxınlıqla həll olunması mümkünsüzdür. Rusiya nə qədər ki, Ukraynanın ərazi bütövlüyünü və suverenliyini tanımır, bu qarşıdurmaya son qoymaq mümkün olmayacaq. Vasitəçilik edən tərəf kim olursa olsun – ABŞ, Türkiyə və ya Avropa İttifaqı ölkələri – nəticə yalnız beynəlxalq hüququn əsas götürülməsi ilə əldə oluna bilər”.

Analitikin fikrincə, münaqişənin davam etməsi region üçün yeni eskalasiya riskləri yaradır. O, bildirib ki, əgər tərəflər arasında sülh sazişi imzalanmazsa, münasibətlərin normallaşmasından danışmaq mümkün deyil. Atəşkəs sazişi yalnız müvəqqəti şərait yarada bilər, amma bu, müharibəyə formal olaraq ara verməkdən başqa bir şey deyil. Sülh müqaviləsi olmadan tərəflər qeyri-müharibə statusunda qalacaq, bu da hər an yeni münaqişə riski deməkdir.

"Medinskinin son bəyanatları Rusiyanın “ya hər şey, ya da heç nə” prinsipi ilə hərəkət etməsinin göstəricisi kimi dəyərləndirilməlidir. Rusiya ya Ukraynanı tam təslim olmağa məcbur etmək, ya da müharibəni davam etdirmək niyyətindədir. Hər iki halda da münaqişənin sonu görünmür. Müharibənin uzanması isə ilk növbədə Rusiyanın özünə ziyan vurur”.

Sonda Aydın Quliyev diqqətə çatdırıb ki, əslində bu qarşıdurmada Rusiya və Ukrayna tərəf deyillər: “Rusiya Ukraynaya qarşı yox, onun arxasında duran Qərb – ABŞ və Avropa dövlətlərinə qarşı savaşır. Məhz bu geosiyasi qarşıdurma vəziyyəti daha da mürəkkəbləşdirir”. 

Qeyd edək ki, Rusiya prezidentinin köməkçisi Vladimir Medinski "The Wall Street Journal" nəşrinə müsahibə verib. O bildirib ki, Ukrayna ilə Rusiya arasında baş verənlər fərqli mədəniyyətlərə malik ölkələr arasında müharibə deyil, eyni tarixə, dilə və mədəniyyətə sahib olan, bir xalqı təmsil edən iki dövlətin qardaş müharibəsidir. Ona görə də Rusiya Ukrayna ilə mümkün qədər tez münaqişəni bitirmək istəyir və bu iki ölkənin gələcəkdə yaxın müttəfiq olacağına inanırlar. 

Ukrayna Xarici İşlər Nazirliyinin sözçüsü Georgi Tixiy isə Medinskinin aşıqlamasına sərt reaksiya verib. Rəsmi nümayəndənin sözlərinə görə, əgər Rusiya hansısa Mərkəzi və ya Şərqi Avropa ölkəsini "qardaş" adlandırırsa, o zaman bu hekayədə o, əlində daşı tutan Qabil rolundadır.

Töhfə Səməd