Kreml Paşinyanı niyə təbrik eləmir? - Hərbi ssenariyə hazırlıq gedir?

İyunun 7-də Ermənistanda parlament seçkiləri keçirildi. Ermənistan Mərkəzi Seçki Komissiyasınn nəticələrinə görə, Baş nazir Nikol Paşinyanın "Vətəndaş Müqaviləsi" Partiyası səslərin 49.82%-ni toplayaraq birinci yeri tutdu. Müxtəlif ölkələrin liderləri Paşinyanı bu münasibətlə təbrik etdiyi halda Kremldən hələ səs- soraq yoxdur.

Rusiya Paşinyanı niyə təbrik eləmir?

Məsələ ilə bağlı  TodayPress TV- yə açıqlamasında siyasi analitik Elçin Xalidbəyli bildirib ki, seçki ərəfəsində Kremlin Ermənistana yönəlik təzyiqləri maksimum səviyyəyə çatdırılmışdı və bu təzyiqlər əslində Ermənistana deyil, birbaşa Paşinyan hakimiyyətinə qarşı yönəlmişdi.  

O bildirib ki, Kreml nəyin bahasına olursa-olsun, Paşinyan hakimiyyətinin dəyişdirilməsinə çalışırdı: 

"Ancaq indi baş verənlər göstərir ki, Kremlin Ermənistanda hakimiyyət dəyişikliyi ilə bağlı planları iflasa uğrayıb. Ən əsası isə odur ki, Kreml Ermənistan məkanında Amerika Birləşmiş Ştatlarına və Avropa Birliyinə məğlub olub".  

Analitik qeyd edib ki, hazırda Paşinyan hakimiyyəti Qərbə yaxınlaşma siyasətini eyni istiqamətdə davam etdirmək niyyətindədir: "Bu  o deməkdir ki, yaxın vaxtlarda həm ABŞ, həm də Avropa Birliyi Ermənistanda daha möhkəm şəkildə möhkəmlənməyə çalışacaqlar. Bu vəziyyət Kremlin Cənubi Qafqazdakı geosiyasi maraqlarının iflasa uğraması, hətta Rusiyanın regionu itirmək təhlükəsinin son mərhələyə keçməsi anlamına gəlir". 

Ekspert hesab edir ki, məhz buna görə də Rusiya Paşinyan hakimiyyətinin legitimliyini şübhə altına almağa çalışır: "

"Kreml nəinki baş nazir Nikol Paşinyanı seçkilərdə qələbəsi münasibətilə təbrik etməyib, əksinə, Rusiya siyasi dairələri Ermənistanda keçirilən seçkilərin demokratik prinsiplərə uyğun olmadığını bəyan ediblər. Bu isə qlobal miqyasda absurd bir iddia kimi görünür. Çünki Rusiya kimi işğalçılıqda ittiham olunan və avtoritar idarəetmənin hökm sürdüyü bir ölkənin başqa bir ölkədə demokratik seçkilərin keçirilmədiyini bəyan etməsi məntiqə uyğun görünmür".

Elçin Xalidbəyli vurğulayıb ki,  Rusiya indi Ermənistanda ciddi problemlər yaratmaq niyyətindədir:

"Demokratiyanın heç vaxt Rusiyada tam şəkildə kök salmadığı bir şəraitdə Kreml Paşinyan hakimiyyətini antidemokratik seçkilər keçirməkdə ittiham edir. Əslində, Ermənistanda seçkilər tam saxtalaşdırılmış olsaydı belə, Rusiya kimi bir ölkənin Ermənistanı bu mövzuda ittiham etməsi mənəvi və siyasi baxımdan mübahisəlidir. Çünki Rusiyanın özü hazırda avtoritar idarəçiliklə bağlı tənqidlərə məruz qalan, həmçinin başqa bir ölkənin beynəlxalq hüquqla tanınmış ərazilərini işğal etməkdə ittiham olunan bir dövlətdir. Bu baxımdan Rusiyanın iddiaları və davranışları məntiqsiz və ziddiyyətli xarakter daşıyır".

Analitik sonda əlavə edib ki, Rusiyanın əsas məqsədi Paşinyan hakimiyyətinin legitimliyini şübhə altına almaq, Ermənistanda yenidən daxili gərginlik yaratmaq, özünə yaxın qüvvələrin hakimiyyətə gəlməsi üçün zəmin formalaşdırmaq və ölkədə mümkün vətəndaş qarşıdurmasından istifadə edərək hakimiyyət dəyişikliyinə nail olmaqdır.

"Yəni Rusiyanın hazırda cəhd göstərdiyi əsas istiqamətlər məhz bunlardır",- o, bildirib. 

Jalə Rövşən