İndi Ankarada Əliyevi gözləyirlər, səni isə harada... - Saral-mış zaman forması

Qaldı Sarala -  sarala...

Gəlin, açıq danışaq.  Başörtüsü məsələsi qısa müddətdə DÖVLƏTİN SÜVERENLİYİ məsələsinə çevrildi. 

Hətta bir rəsmdə deyəsən Şəhriyar Sarıca idi müəllifi, yazılmışdı ki, Prezident əvvəlcə torpaqları azad etdi, indi isə xalqımızı.

Nə baş verdi?

Oktay Saral kimdir? Türkiyə Cümhurbaşqanının Başdanışmanı idi. Vəzifəsi - Türkiyə dövlətinə xidmət etmək idi. Amma 13 Oktyabrda durduğu yerdə Azərbaycanın daxili təhsil qərarına qarışdı. 

Həmin günlərdə Azərbaycan rəsmi qaydada elan etdi ki, söhbət ümumiyyətlə "başörtüsü yasağı"ndan getmir. Söhbət məktəbdə vahid uniformanı pozan, dünyəvilik prinsipinə zidd olan əlavə geyimlərin qadağasından gedir. Yəni qanun hamı üçündür, uniforma hamı üçündür.

Saral isə buna qarşı çıxaraq, araşdırmadan sosial mediada populist çıxışlar edərək,  "Qəbul edilə bilməz!"deyib ortalığı bir- birinə qatdı.

Əsas sualı da haqlı olaraq, biz verdik: 

Sən kimsən ki, Azərbaycanın təhsil sisteminin nəyi qəbul edib-etməyəcəyini müəyyən edirsən?

Bəs Ankara niyə dərhal tədbir gördü?

Çünki Bakı haqlı olaraq məsələni qaldırdı. Mənbələrin Middle East Eye-a dediyi faktı və bu gün Talat Atilla-nın təsdiqlədiyi kimi, Azərbaycan rəsmi kanallarla bildirdi ki,  "Bizim daxili işimizə qarışan Başdanışman istəmirik."

Və nə oldu? Bu gün Talat Atilla özü yazır:

"Görevden alındınız mı? diye sordum. Evet. Biz makamlarla kaim değiliz. Sayın Cumhurbaşkanımız göreve getirdi, kendisinin talimatıyla ayrıldım dedi. Azerbaycan'la ilgili açıklamalarınız nedeniyle mi? diye sordum. Evet, öyle görünüyor karşılığını verdi."

Yəni adam özü etiraf edir ki, Azərbaycan açıqlamasına görə getdi.

Bu nə deməkdir?

Bu o deməkdir ki, Türkiyə dövləti Azərbaycanın haqlı mövqeyini anladı. Prezident Erdoğan özü talimat verib Saralı göndərdi. Çünki Erdoğan bilir: Azərbaycan - Türkiyə münasibətləri bir başdanışmanın Twitter populizmindən qat-qat böyükdür. "Bir millət, iki dövlət" şüarı, kiminsə şəxsi reyting yığmaq üçün məsələ ola bilməzdi. 

Saral kimilərə dərs olmalıdır:

1. Azərbaycan dünyəvi, hüquqi dövlətdir. Məktəb uniforması qaydasını Bakı müəyyən edər, Ofdan gələn başdanışman yox.

2. Sən başörtüsünü müdafiə etmək istəyirsənsə, əvvəl öz ölkəndəki problemləri həll et. Azərbaycan qadınına sən din öyrətmə. Azərbaycan qadını həm hicablı, həm savadlı, həm də dövlətinə sadiq olmağı səndən yaxşı bilir.

3. Dövlətlərarası münasibətlərdə həddini bilmək lazımdır. Başdanışman dövlət adına danışır. Dövlət adına danışırsansa, sözünün hara gedib çıxacağını bilməlisən.

Bu gün Saralın getməsini Bakının sözünün Ankaranın ən yüksək kabinetində eşidilməsi kimi görürəm.

Ona görə də bu məsələ bağlandı. Saral getdi, Azərbaycan-Türkiyə qardaşlığı qaldı.

Nöqtə.

İndi Ankarada Əliyevi gözləyirlər, səni isə harada...

Əziz Əlibəyli

Beynəlxalq məsələlər üzrə ekspert