Mədə ağrılarından əziyyət çəkənlərin NƏZƏRİNƏ: Lansodens nə vaxt və necə istifadə olunmalıdır?

Müasir dövrdə gərgin iş rejimi, qeyri-düzgün qidalanma və xroniki stres səbəbindən həzm sistemi xəstəliklərindən əziyyət çəkənlərin sayı sürətlə artır. Mədədə yanğı hissiyyatı, qıqırma və reflüks kimi şikayətlərlə həkimə müraciət edən pasiyentlərə tez-tez təyin olunan preparatlardan biri də Lansodensdir.

Lansodens nədir və orqanizmə necə təsir edir?

Səhiyyə mütəxəssislərinin bildirdiyinə görə, Lansodens preparatının əsas təsiredici maddəsi lansoprazoldur (Lansoprazole). Farmakologiyada proton nasosu inhibitorları (PNI) qrupuna aid edilən bu dərman mədədə həddindən artıq duz turşusunun ifrazının qarşısını almaq üçün nəzərdə tutulub.

Mədə divarındakı xüsusi hüceyrələrin hidrogen-potasium nasos mexanizmini bloklayan Lansodens mədə mühitindəki kəskin turşuluğu azaldır, zədələnmiş selikli qişanın və xoraların bərpa olunmasını sürətləndirir, turşunun qida borusuna qayıtması nəticəsində yaranan göynəmə və ağrı hissini aradan qaldırır.

Bəs Lansodens hansı xəstəliklərdə tətbiq olunur?

Qastroenteroloqlar bildirirlər ki, preparat əsasən aşağıdakı diagnostik hallarda kompleks müalicəyə daxil edilir:

Mədə və onikibarmaq bağırsaq xorası: Kəskinləşmə dövründə xoraların sağalmasını təmin edir.

Qastroezofageal Reflüks Xəstəliyi (QERX): Mədə möhtəviyyatının qida borusuna sızması və iltihab yaranması halında.

Helicobacter pylori infeksiyası: Mədə mikroflorasına zərər vuracaq bakteriyanın məhvi üçün antibiotiklərlə birgə istifadə edilir.

Ağrıkəsicilərin törətdiyi fesadlar: Qeyri-steroid iltihabəleyhinə dərmanların (ibuprofen, diklofenak və s.) uzunmüddətli istifadəsi zamanı mədə zədələnmələrinin qarşısını almaq üçün.

Zollinger-Ellison sindromu: Mədədə patoloji dərəcədə yüksək turşu sintez olunduğu hallarda.

Ekspertlər Lansodens qəbulu zamanı müəyyən qaydalara ciddi əməl olunmasını vacib sayırlar. Belə ki, sözügedən dərman, adətən, səhər acqarına, yeməkdən ən azı 30 dəqiqə əvvəl içilməlidir. Qida qəbulu lansoprazolun sorulmasını azalda bilər. Kapsul bütünlüklə, zədələnmədən bol su ilə udulmalıdır. Xəstəliyin ağırlıq dərəcəsindən asılı olaraq sutkalıq doza 15 mq və ya 30 mq təşkil edə bilər.

Qeyd edək ki, həkim nəzarəti olmadan proton nasosu inhibitorlarının uzun müddət qəbul edilməsi orqanizmdə B12 vitamini və maqnezium çatışmazlığına, eyni zamanda sümük kövrəkliyinə (osteoporoz riski) gətirib çıxara bilər.

Bu səbəbdən dərmanın həkim məsləhəti olmadan istifadəsi yolverilməzdir.

Aysel Mətləb