Bu vitamin yaşlılarda əzələ gücünü qorumağa kömək edə bilər

“K” vitamini yalnız qanın laxtalanmasında deyil, yaşlı yaşlarda əzələ gücünün qorunmasında da rol oynaya bilər.

TodayPress TV xəbər verir ki, bu nəticə Çinin Şimali Siçuan Tibb Kollecinin alimlərinin hazırladığı icmal araşdırmada qeyd olunub. Tədqiqatın nəticələri "Frontiers in Nutrition" jurnalında dərc edilib.

Araşdırmada alimlər “K” vitamini ilə sarkopeniya — yaş artdıqca əzələ kütləsinin, gücünün və dözümlülüyünün azalması arasındakı mümkün əlaqəni təhlil ediblər. Bildirilib ki, bu vəziyyət yıxılma riskini artırır və insanların müstəqil hərəkət qabiliyyətini zəiflədə bilər.

Tədqiqatçıların sözlərinə görə, “K” vitamini osteokalsin, MGP və Gas6 kimi “K” vitamininə bağlı zülalların aktivləşməsində iştirak edir. Bu zülallar toxumaların bərpası, damarların vəziyyəti və əzələlərdə enerji mübadiləsi ilə əlaqəlidir.

Eksperimental modellərdə “K” vitamininin iltihabəleyhinə və antioksidant xüsusiyyətlərə malik olduğu, həmçinin hüceyrələrin “enerji stansiyası” sayılan mitoxondrilərin fəaliyyətinə təsir göstərdiyi müəyyən edilib.

Müşahidə tədqiqatları göstərir ki, orqanizmdə “K” vitamini səviyyəsi yüksək olan insanlarda fiziki funksiyalar daha yaxşı, əl sıxma gücü daha yüksək və funksional məhdudiyyətlərin riski daha aşağı olur.

Bununla belə, alimlər bildirirlər ki, “K” vitamini əlavələrinin təsiri ilə bağlı klinik tədqiqatların nəticələri hələ də ziddiyyətlidir. Effekt vitaminin “K1” və ya “K2” forması, doza və iştirakçıların sağlamlıq vəziyyətindən asılı ola bilər.

Qiymət Mahir