Rusiyanın Cənubi Qafqaz planı: Ermənistan yenidən alətə çevrilir...

“Rusiya Cənubi Qafqaza Ermənistan vasitəsi ilə qayıtmaq istəyir”.

Politoloq Vəli Əlibəyov bunu TodayPress TV-yə danışarkən deyib.

O diqqətə çatdırıb ki, Rusiyanın başı Ukraynaya qarışdıqdan sonra bir müddət məcburən Cənubi Qafqazdan əlini çəkməli olub. Amma ABŞ-də Donald Tramp hakimiyyətə qayıtdıqdan və onun açıq şəkildə rusiyapərəst mövqe tutmasından sonra Kreml başa düşür ki, əvvəlki mövqelərini geri qaytarmaq üçün şans yaranıb. Cənubi Qafqaz da bu məsələdə onun üçün prioritet istiqamətdir. 

“Necə qayıdacaq? Əslində Rusiya Qafqazda var. Bilirik ki, Gürcüstandakı hakimiyyət birbaşa Rusiya mövqeyindədir. Ermənistan isə neçə illərdir Rusiyanın təsir dairəsindən çıxmağa çalışır. Rusiya xarici işlər naziri Sergey Lavrov Ermənistanda səfər edib. Neçə müddətdir ki, Gümrüdə yerləşən Rusiyaya məxsus 102-ci hərbi bazanın çıxarılması ilə bağlı söz-söhbət gəzir. Əlbəttə, bu, qeyri-realdır, çünki hüquqi cəhətdən 2045-ci ilə qədər aralarında müqavilə var. Bununla belə Ermənistanda belə mövqeyin səslənməsi Rusiyanı narahat edə bilər”. 

Analitikin qənaətincə, Lavrovun səfəri həm bu məsələni həll etmək, həm də Ermənistanın Kollektiv Təhlükəsizlik Müqaviləsi Təşkilatında (KTMT) aktivliyini artırmaq məqsədi daşıya bilər:

“Çünki son illərdə Ermənistan KTMT-dən çıxmağa can atır. Bununla da Ermənistanı öz təsir dairəsinə qaytarmaq istəyir. Yəni Cənubi Qafqaza əsasən Ermənistan vasitəsi ilə qayıtmaq istəyir. Gümrüdəki baza NATO ölkəsi Türkiyənin qarşısını almaq funksiyası daşıyır. Ermənistan özü də Rusiya ilə NATO arasında bufer zona rolunu oynayır. Ermənistandan savayı Rusiya Azərbaycanı da nəzərdə tutur. Son zamanlar Azərbaycana qarşı edilən təzyiqlər, Milli Məclisin deputatı Azər Badamovun deportasiya edilməsi, Rusiyanın bəzi deputatlarının Azərbaycana qarşı sərt bəyanatlar səsləndirməsi Rusiyanın hələ də Azərbaycanla bağlı fikirlərinin olması barədə məlumat verir. Onlar heç istəməzdilər ki, Azərbaycan Qarabağı qaytarsın. Azərbaycan öz ərazi bütövlüyünü bərpa edəndən sonra istədilər ki, öz sülhməramlı qüvvələrini Qarabağda saxlasınlar. Bu da alınmayandan sonra müxtəlif yollar fikirləşməyə başlayıblar. Ola bilsin, Zəngəzur dəhlizi məsələsində də nəzarəti öz əllərinə götürmək istəyirlər”.

V. Əlibəyov sonda bildirib ki, Rusiyanın hazırda Qafqazda mövcudluğu Gürcüstan üzərindədir, Ermənistanda hərbi bazası var, amma mövqeləri zəifdir. O düşünür ki, Rusiya Azərbaycanı da təsir dairəsinə salmaq üçün ciddi cəhdlər göstərəcək.

Qeyd edək ki, Ukraynada mümkün atəşkəs gözləntiləri fonunda Rusiyanın regionumuza necə qayıdacağı və qayıtmaq üçün hansı rıçaqları işə salacağı sualı aktuallaşıb. 

Qiymət Mahir