Azərbaycanın Ukrayna siyasəti: REGİONAL SABİTLİYƏ TÖHFƏ

“Azərbaycanın Ukrayna siyasəti balanslaşdırılmış və milli maraqlara uyğun şəkildə davam edir”. 

Politoloq Azad Məsiyev bunu TodayPress TV-yə danışarkən deyib. 

Onun sözlərinə görə, Azərbaycan Ukraynanın ərazi bütövlüyünü dəstəkləməkdə davam edir və bu, rəsmi Bakı tərəfindən beynəlxalq hüquqa əsaslanaraq dəfələrlə bəyan edilib.

Azərbaycanın əsas istəyi Rusiya-Ukrayna münaqişəsinin tezliklə diplomatik yolla həll edilməsidir və bu yanaşma ölkə rəhbərliyi tərəfindən davamlı şəkildə ifadə olunub.

"Ukraynanın xarici işlər naziri Andrey Sibiqanın Azərbaycana son səfəri, Prezident İlham Əliyevlə, eləcə də xarici işlər naziri Ceyhun Bayramov və iqtisadiyyat naziri Mikayıl Cabbarovla görüşləri Ukraynanın Azərbaycanla əməkdaşlıqda maraqlı olduğunu göstərir. Bu səfər iki ölkə arasında mövcud olan siyasi və iqtisadi münasibətlərin inkişafına xidmət edir. Azərbaycan Ukraynaya humanitar yardım göstərməkdə də davam edir və bu, rəsmi Bakının münaqişə bölgəsində baş verən humanitar fəlakətə biganə qalmadığının göstəricisidir. Biz bu məsələdə balanslaşdırılmış siyasət yürüdürük və münaqişə tərəflərindən heç birini dəstəkləmirik. Bunun səbəbi isə tək istəyimiz regionda sülhün əldə olunmasıdır". 

Analitik diqqətə çatdırıb ki, Azərbaycan neytral mövqe sərgiləyir və Qərbdən gələn təzyiqlərə baxmayaraq, milli maraqlara əsaslanan balanslı xətt aparır. Bu, həm ölkənin beynəlxalq imicinə, həm də regional sabitliyə töhfə verir.

Bundan başqa, Azərbaycan ilə Ukrayna arasında münasibətlərin gələcəkdə daha da inkişaf etməsi üçün əsas istiqamətlər iqtisadi və humanitar sahələrdir. Xüsusilə də, Ukraynanın enerji infrastrukturunun müharibə səbəbilə zərər görməsi fonunda Azərbaycanın enerji sahəsində dəstəyinə ehtiyac olduğu vurğulanır.

“Sibiqanın azərbaycanlı həmkarı ilə baş tutan mətbuat konfransında məhz humanitar yardımlara görə təşəkkürlərini bildirməsi və Azərbaycanın dəstəyini davamlı olaraq hiss etdiklərini vurğulaması məhz bunun sübutudur. Həmçinin Ceyhun Bayramovun rəsmi Bakının Kiyevə humanitar yardımı davam etdirəcəyini qətiyyətlə söyləməsi qarşılıqlı etimadın gücləndirilməsinə çox böyük töhfələr verdi. Belə ki, Azərbaycan tərəfi bu günə kimi Ukraynaya 40 milyon dollardan artıq humanitar yardım göndərib.  Həmçinin rəsmi Bakı yaxın dövrdə keçiriləcək Ukraynanın Bərpası Konfransına da önəm verir və burada iştirak edəcəyini açıqlayıb. Bu, Azərbaycanın humanistliyindən xəbər verir”.

Qeyd edək ki, Ukraynanın xarici işlər naziri Andrey Sibiqa mayın 25-də Azərbaycana rəsmi səfərə gəlib. Səfər çərçivəsində Azərbaycan Prezidenti İlham Əliyev ukraynalı XİN başçısını qəbul edib.     

Daha sonra Sibiqanın Azərbaycanın xarici işlər naziri Ceyhun Bayramovla təkbətək və geniş tərkibdə görüşü baş tutub. Həmçinin iqtisadiyyat naziri Mikayıl Cabbarov Ukrayna XİN başçısı ilə ölkələrarası iqtisadi əməkdaşlığı müzakirə edib.     

Töhfə Səməd