ABŞ-ni nə dayandırdı? - yeni iddialar ortaya çıxdı

İki həftəlik intensiv hərbi əməliyyatlardan sonra ABŞ İrana qarşı hücumlarını ardıcıl ikinci gündür dayandırıb, Tehran isə regionda ABŞ qüvvələrinə qarşı cavab hücumlarının dayandırıldığını elan edib.

Ağ Evin məlumatına görə, Prezident Donald Tramp İrana qarşı daha genişmiqyaslı hərbi kampaniya planlarını təxirə salıb və bunun əvəzinə Oman və Pakistanın rəhbərlik etdiyi vasitəçilik səyləri çərçivəsində diplomatiyaya daha bir fürsət verməyi seçib.

Lakin ABŞ-nin nüfuzlu media orqanlarına göz gəzdirəndə fərqli mənzərə ilə qarşılaşırıq.  Məlumatlara görə, iki həftəlik hava kampaniyası nəzərdə tutulan strateji məqsədlərə tam çata bilməyib və ABŞ ordusunu böyük həcmdə bahalı, dəqiq idarə olunan sursatlardan, xüsusilə raketdən müdafiə sistemlərinin tutucu raketlərindən istifadə etməyə məcbur edib.

Ehtiyatlar azaldıqca, Amerika hərbi komandanlığının hansı təhdidlərə qarşı resurslardan istifadə edəcəyini daha seçici şəkildə müəyyənləşdirmək məcburiyyətində qaldığı bildirilir.

Məlumatlarda  iddia edilir ki, vitse-prezident J.D. Vens və Birləşmiş Qərargah Rəisləri Komitəsinin sədri, general Den Keyn Prezident Donald Trampa hər hansı genişmiqyaslı eskalasiyanın ABŞ-nin raketdən müdafiə imkanlarına ciddi təzyiq göstərə biləcəyi barədə xəbərdarlıq ediblər.

Sursat ehtiyatlarının mövcudluğu və uzunmüddətli hərbi hazırlıqla bağlı artan narahatlıqlar fonunda administrasiyanın diqqətini yenidən diplomatiyaya yönəldərək daha genişmiqyaslı hücum planlarını məhdudlaşdırdığı bildirilir.

Əgər bu qiymətləndirmələr Vaşinqtonun daxili hesablamalarını düzgün əks etdirirsə, əməliyyatlara verilən fasilə təkcə diplomatik mülahizələrdən qaynaqlanmır deməkdir. Buna həm də uzunmüddətli, yüksək intensivlikli hərbi kampaniyanın davam etdirilməsi reallıqları səbəb ola bilər. 

Jalə Rövşən