Bədəndə aqressiv ağciyər xərçənginə qarşı gizli bir "silah" aşkar edildi
Avstraliyanın Valter və Eliza Holl İnstitutunun alimləri qamma-delta T-limfositlərinin kiçik hüceyrəli ağciyər xərçəngi hüceyrələrini tanıyaraq məhv edə bildiyini müəyyən ediblər. Bu hüceyrələr şişin immun sisteminin digər komponentlərindən gizləndiyi hallarda belə təsir göstərə bilir.
TodayPress TV xəbər verir ki, tədqiqatçılar mövcud dərmanların köməyi ilə onların təsirini gücləndirməyə nail olublar.
Kiçik hüceyrəli ağciyər xərçəngi ən aqressiv şiş növlərindən biri hesab olunur. Müalicəni çətinləşdirən səbəblərdən biri onun adi T-hüceyrələrindən yayınmaq qabiliyyətidir. İmmunoterapiyanın bir çox növü məhz həmin hüceyrələrin fəaliyyətinə əsaslanır. Yeni araşdırma isə immun sisteminin xərçəngə qarşı mübarizədə başqa mexanizmə də malik olduğunu göstərib.
İlk mərhələdə alimlər IMpower133 və CASPIAN adlı iki geniş klinik tədqiqatın məlumatlarını təhlil ediblər. Şişlərdə qamma-delta T-hüceyrələrinin daha çox olması immunoterapiyadan əldə edilən faydanın artması ilə əlaqələndirilib.
Daha sonra xəstələrdən götürülmüş nümunələr əsasında laboratoriyada kiçik şiş modelləri yetişdirilib. Həmin modellərə eyni xəstələrin qanından ayrılmış qamma-delta T-hüceyrələri əlavə edilib. İmmun hüceyrələri xərçəng hüceyrələrini uğurla tanıyaraq məhv edib.
Alimlər bu təsiri iki preparatın köməyi ilə daha da gücləndiriblər. Zoledronat qamma-delta T-hüceyrələrinin əlçatan sayını artırıb və şişin tanınmasını yaxşılaşdırıb. Tarlatamab isə immun hüceyrələri ilə xərçəng hüceyrələrinin bir-birinə yaxınlaşmasına kömək edib.
Laboratoriya modelində hər iki preparatın birlikdə istifadəsi xərçəng hüceyrələrinə hücumun effektivliyini artırıb. Bununla belə, nəticələrin xəstələrdə müalicənin effektivliyini təsdiqləməsi üçün əlavə klinik araşdırmalara ehtiyac var.
Aysel Mətləb
