Valerian və anaçotu xroniki stress zamanı praktiki olaraq faydasızdır, çünki onlar güclü narahatlıq mexanizmlərinə təsir göstərə və ya kortizol səviyyəsini effektiv şəkildə azalda bilmir.

TodayPress TV xəbər verir ki, bunu nevroloq Mariya Lavrenova "Gazeta.ru"ya açıqlamasında  bildirib.

O qeyd edib ki, bu bitki mənşəli vasitələr çox vaxt plasebo effekti kimi işləyir.

“Valerian və anaçotunun sakitləşdirici təsiri çox zəifdir və klinik baxımdan qeyri-sabitdir. Genişmiqyaslı sistematik araşdırmalar göstərir ki, bu bitki mənşəli vasitələr əksər hallarda plasebo səviyyəsində təsir edir və sinir sisteminə yalnız minimal sakitləşdirici təsir göstərir”, – deyə nevroloq izah edib.

Mütəxəssisin sözlərinə görə, bu cür bitki mənşəli vasitələr bəzən yalnız çox yüngül yuxu problemləri olan insanlara kömək edə bilər. Onların zəif rahatladıcı təsiri gündəlik yorğunluq və ya qısamüddətli narahatlıqdan sonra yuxuya getməyə yardım edə bilər. Belə hallarda insanın dərmana inamı və damcı və ya tablet qəbul etmək kimi sakitləşdirici axşam ritualı da mühüm rol oynayır.

Həkim bildirib ki, uzunmüddətli stress zamanı kortizol hormonunun səviyyəsi yüksək qalır və bitki ekstraktları adətən bu göstəricini azaltmağa qadir olmur. Bu vasitələrin zəif təsiri obsesiv düşüncələrin və fizioloji gərginliyin “qapalı dövrə”sini qırmaq üçün kifayət etmir.

Mütəxəssis qeyd edib ki, daimi səhər yorğunluğu, işə diqqət cəmləyə bilməmək və yuxu ilə bağlı obsesiv düşüncələr səbəbindən gecə yatmaq qorxusu yarandıqda mütləq həkimə müraciət edilməlidir.

“Yuxu problemləri üç-dörd həftədən çox davam edərsə, somnoloq və ya psixiatrla məsləhətləşmək lazımdır. Belə hallarda koqnitiv-davranış terapiyası qızıl standart hesab olunur və zərurət yarandıqda həkim effektivliyi sübut olunmuş müasir reseptli dərmanlar təyin edə bilər",-həkim sonda əlavə edib. 

Jalə Rövşən 

TodayPress TV