Hamiləlikdə idmanla bağlı maraqlı faktlar: Alimlər açıqladı

Hamiləlik dövründə fiziki aktivlik uşağın maddələr mübadiləsini yaxşılaşdırır, lakin doğuşdan əvvəlki stress bu təsiri zəiflədə və ya aradan qaldıra bilər.

Todaypress TV  xəbər verir ki, bu barədə "Gazeta.ru" da məqalə dərc olunub.

Belə ki, ABŞ-nin  Wexner Universiteti Tibb Mərkəzinin tədqiqatçıları C57BL/6 siçanları üzərində təcrübə aparıblar. Onlar fiziki aktivlik səviyyəsinə və stressə məruz qalma vəziyyətinə görə dörd qrupa bölünüblər. Nəticələr göstərib ki, fiziki cəhətdən aktiv və stressə məruz qalmayan anaların erkək balaları qlükoza tolerantlığının yaxşılaşması ilə xarakterizə olunan daha sağlam metabolik göstəricilər nümayiş etdiriblər.

Lakin hamiləlik dövründə anaları stressə məruz qalan erkək balalarda, dişi analar fiziki aktiv qalsalar belə, bu müsbət təsir müşahidə olunmayıb. Dişi nəsildə isə oxşar əhəmiyyətli fərqlər aşkar edilməyib.

Alimlər bu təsiri kortikosteroidlər – stress hormonlarının təsiri ilə izah edirlər. Bu hormonlar enerjinin sərf olunması və bədən istiliyinin tənzimlənməsində rol oynayan qəhvəyi yağ toxumasının fəaliyyətinə təsir göstərə bilər. Tədqiqatçılara görə, bu mexanizmlərin pozulması “metabolik proqramlaşdırma”ya – yəni doğuşdan əvvəl maddələr mübadiləsinin formalaşmasına təsir edir.

Tədqiqatçılar ananın psixo-emosional vəziyyətinin uşağın gələcək sağlamlığında mühüm rol oynadığını vurğulayırlar. Nəticələr hamiləlik dövründə fiziki aktivliyin faydaları qiymətləndirilərkən stress səviyyəsinin də nəzərə alınmasının vacibliyini göstərir.

Jalə Rövşən 

Todaypress TV