Uşaqlara desert əvəzinə palçıq yedirtdilər
ABŞ-də keçirilən xeyriyyə şam yeməyi zamanı lisey şagirdlərinə səhvən desert əvəzinə torpaq təqdim olunub.
TodayPress TV "NY Post"a istinadən xəbər verir ki, üç yeniyetmə palçığı desert hesab edərək dadıb.
Hadisə Medomak Valley High School məktəbində baş verib. Həmin gün şagirdlər biologiya dərsində torpağın sterilizasiyasının bitki inkişafına təsirini öyrənmək üçün təcrübə aparıblar. Bunun üçün bir qədər torpaq sobada qızdırılıb və folqa ilə örtülərək digər yeməklərdən ayrı masaya qoyulub.
Lakin xeyriyyə tədbirinə hazırlıq zamanı yaranan qarışıqlıq səbəbindən həmin qab desert hesab edilərək şagirdlərə təqdim olunub.
Məktəbin direktoru Linda Piz tərəfindən imzalanmış açıqlamada bildirilib ki, üç şagird bişmiş torpağın dadına baxsa da, bunun nə olduğunu dərhal anlayaraq ağızlarından çıxarıblar.
Məktəb rəhbərliyi hadisənin zarafat deyil, sadəcə uğursuz anlaşılmazlıq olduğunu vurğulayıb və şagirdlərin valideynləri ilə əlaqə saxlanıldığını bildirib. Tədbirin təşkilatçıları isə baş verənlərdən dərin təəssüf hissi keçirdiklərini qeyd ediblər.
Jalə Rövşən
