İran müharibəsi Trampa səs verənləri peşman etdi
ABŞ-nin İrana qarşı hərbi əməliyyatlara başlamasından altı ay sonra müharibəyə qarşı çıxan amerikalıların sayı rekord həddə çatıb.
TodayPress TV xəbər verir ki, "Navigator Research"in araşdırmasına görə, amerikalıların 54 faizi ABŞ-nin İrana qarşı hərbi əməliyyatlarına qarşıdır. Bu, araşdırmaların aparıldığı dövrdə qeydə alınan ən yüksək göstəricidir. Müstəqil seçicilər arasında müharibəyə qarşı olanların payı isə 66 faizdir.
Respondentlərin 39 faizi hərbi əməliyyatları dəstəklədiyini, 54 faizi isə qarşı olduğunu bildirib. Beləliklə, müharibəyə xalis dəstək göstəricisi mənfi 15 faiz təşkil edib.
Amerikalıların 58 faizi İrana qarşı müharibənin buna dəymədiyini düşünür. Onların 41 faizi bu fikri qəti şəkildə ifadə edib. Apreldə müharibənin buna dəymədiyini düşünənlərin payı 50 faiz idi.
Demokratlara etimad isə artıb.
İran müharibəsi ilə bağlı demokratlara etimad Prezident Donald Tramp və Respublikaçılara etimadı üstələyib. Respondentlərin 36 faizi demokratlara, 32 faizi isə Respublikaçılara etimad etdiyini bildirib.
Mart ayında isə vəziyyət əksinə olub. Həmin vaxt Tramp və Respublikaçılara 39 faiz, demokratlara isə 31 faiz etimad göstərilmişdi.
Respondentlərin 25 faizi bu məsələdə hər iki siyasi tərəfə etimad etmədiyini bildirib. Müstəqil seçicilər arasında bu göstərici 55 faizdir.
Amerikalılar əsas diqqətin iqtisadiyyata yönəldilməsini istəyir.
Araşdırmaya görə, amerikalıların 60 faizi hökumətin əsas diqqəti inflyasiya və yaşayış xərclərinə yönəltməsini istəyir. 46 faiz isə iş yerləri və iqtisadiyyatın prioritet olmasını vacib sayır.
Bununla yanaşı, respondentlərin 50 faizi prezident Trampın və Konqresdəki Respublikaçıların əsas diqqəti xarici münaqişələrə yönəltdiyini düşünür.
11 sentyabr 2001-ci il terror hücumlarından 25 il sonra amerikalılar Yaxın Şərqdə həyata keçirilən hərbi müdaxilələrin ölkəni daha təhlükəsiz edib-etmədiyi barədə iki yerə bölünüb.
Respondentlərin 45 faizi bu müdaxilələrin ABŞ-ni daha təhlükəsiz etmədiyini, 40 faizi isə ölkənin təhlükəsizliyinə töhfə verdiyini düşünür.
Hərbi qulluqçular və hərbi ailələrdən olan şəxslər müdaxilələrin uğurlu olduğunu düşünməyə daha meyllidirlər: bu qrupda 47 faiz müharibələrin buna dəydiyini, 38 faiz isə dəymədiyini bildirib.
Trampa səs verənlərin bir hissəsi qərarından peşmandır.
2024-cü ildə Trampa səs verənlərin 18 faizi hazırda verdiyi səsdən peşman olduğunu bildirib.
Bu şəxslərin 45 faizi peşmanlığının əsas səbəbi kimi İranla müharibə və Trampın xarici siyasət qərarlarını göstərib. 43 faiz isə qiymətlərin artması və yaşayış xərclərini əsas səbəb kimi qeyd edib.
Araşdırmada Trampa səs verdiyinə görə peşman olanların ilk dəfə hansı məsələdən sonra seçimlərinə şübhə etməyə başladıqları da soruşulub. Ən çox səsləndirilən sözlər arasında “qiymətlər” və “müharibə” olub.
Jalə Rövşən
