Rusiya mediası “xalq işsiz deyil” deyir — amma Ukrayna zərbələrini göstərmir
Bu həftə — 31 avqust–4 sentyabr aralığında — Rusiya media məkanında diqqətlə izlənilən mənzərə göstərir ki, federal telekanallardan tutmuş analitik nəşrlərə qədər əsas diqqət üç istiqamət üzərində cəmlənib: daxili sosial-iqtisadi gərginliklər, logistika və energetika böhranı, eləcə də xarici siyasətdə Şərq balansı.
TodayPress TV xəbər verir ki, həftənin ən mühüm və geniş müzakirə olunan daxili mövzusu sentyabrın 1-də qeyd olunan “Bilik Günü” və təhsil sisteminin yeni tədris ilinə hazırlığı olub.
Rəsmi media dövlət rəhbərliyinin məktəb infrastrukturu və regionlarda hazırlıqla bağlı bəyanatlarını ön plana çıxarsa da, müstəqil və iqtisadi təhlil kanallarında inflyasiya təzyiqi əsas mövzuya çevrilib. İqtisadi İnkişaf Nazirliyinin ilin sonu üçün inflyasiya proqnozunu 6,32%-ə qaldırması, xüsusən məktəbli ləvazimatlarının və məişət xərclərinin nəzərəçarpacaq dərəcədə bahalaşması fonunda, ictimaiyyətdə geniş rezonans doğurub. Hökumət tərəfindən “iqtisadiyyatın dayanıqlılığı” və işsizliyin rekord səviyyəyə yaxın aşağı həddə (2,3%) qalması təbliğ edilsə də, gündəlik tələbat mallarının qiymət artımı xəbər lentlərinin ayrılmaz hissəsinə çevrilib.
Həftənin ən kritik xəbər xətlərindən biri də energetika və yanacaq bazarı ilə bağlı olub.
Rusiya daxili bazarında benzinin qiymətini sabitləşdirmək və çatışmazlığı aradan qaldırmaq məqsədilə hökumətin benzin ixracına qoyulan müvəqqəti qadağanı uzatması və eyni zamanda yanacaqdoldurma məntəqələrində “Avro-5” standartından aşağı olan yanacaqların satışına müvəqqəti icazə verməsi mediada geniş şərh edilib. Hərbi əməliyyatların və neft emalı zavodlarına edilən PUA hücumlarının yaratdığı logistik çətinliklər daxili bazarda yanacaq balansının qorunmasını zəruri edib.
Eyni zamanda, Ukrayna istiqamətindən gələn dron zərbələrinin artıq Başqırdıstan kimi uzaq sənaye bölgələrinə, o cümlədən Sterlitamakdakı neft-kimya müəssisələrinə çatması və Yekaterinburq kimi mərkəzi şəhərlərdə infrastrukturun zədələnməsinə yol açması Rusiya mediasında regional təhlükəsizlik və hava hücumundan müdafiə məsələləri ilə bağlı müzakirələri yenidən gündəmə gətirib.
Xarici siyasət gündəmində isə əsas fiqurlar yenə Şərq və Qlobal Cənub tərəfdaşları olub. Həftənin əvvəlində Şanxay Əməkdaşlıq Təşkilatının tədbirləri fonunda Vladimir Putinin Çin Xalq Respublikasının sədri Si Cinpin və Hindistanın Baş naziri Narendra Modi ilə keçirdiyi ikitərəfli görüşlər manşetlərdən düşməyib. Rusiya mediası bu təmasları Qərbin sanksiya təcridini alt-üst edən geosiyasi qələbə və Şimal Dəniz Marşrutu kimi strateji logistik layihələrdə Asiya tərəfdaşları ilə dərinləşən əməkdaşlığın göstəricisi kimi təqdim edib.
Paralel olaraq, Xarici İşlər Nazirliyinin Şimal Qütbündə NATO-nun hərbi fəallığının artmasına dair xəbərdarlıqları və Arktikanın yeni qarşıdurma zonasına çevrilməsi riskləri haqqında analitik məqalələr də Kremlin xarici təhlükəsizlik ritorikasını tamamlayıb.
Qiymət Mahir
