Türkiyə və Polşadan tələbələrə böyük fürsət - birgə diplomlar gəlir

Türkiyə və Polşa arasında ali təhsil sahəsində əməkdaşlıq memorandumu imzalanıb

Türkiyənin Ali Təhsil Şurası ilə Polşanın Elm və Ali Təhsil Nazirliyi arasında "Ali Təhsil Sahəsində Əməkdaşlığa dair Anlaşma Memorandumu" imzalanıb.

TodayPress TV xəbər verir ki, bu barədə Türkiyənin Ali Təhsil Şurasından açıqlama verilib.

Bildirilib ki, qurumun sədri professor Erol Özvarın Polşaya səfəri çərçivəsində imzalanan memorandum Türkiyə və Polşa arasında birgə diplom proqramları, akademik mobillik, tədqiqat layihələri və ali təhsil sistemlərinin uyğunlaşdırılması kimi sahələrdə yeni işbirliyini hədəfləyir.

Erol Özvar və Polşanın elm və ali təhsil naziri Marçin Kulasek tərəfindən imzalanan sənədə əsasən, iki ölkə arasında süni intellekt, rəqəmsal texnologiyalar, enerji çevrilməsi, səhiyyə elmləri və biotexnologiya kimi strateji sahələrdə birgə layihələrin hazırlanması nəzərdə tutulur.

Razılaşma çərçivəsində aşağıdakı addımların atılması planlaşdırılır:

- Enerji çevrilməsi, innovativ sənaye texnologiyaları, dayanıqlı kənd təsərrüfatı, rəqəmsallaşma, süni intellekt, ictimai səhiyyə və biotexnologiya sahələrində birgə elmi tədqiqatların aparılması, təcrübə mübadiləsi və elmi konsorsiumların yaradılması.

- Hər iki ölkənin qanunvericiliyinə uyğun olaraq ali təhsil və tədqiqat müəssisələri arasında bakalavr və magistratura səviyyələrində birgə diplom proqramlarının açılması, tətbiqi və inkişaf etdirilməsi.

- Bakalavr və magistr səviyyəsində tələbə mübadiləsinin təşviqi, həmçinin müəllim heyəti və tədqiqatçıların xüsusi proqramlar, qısamüddətli təşəbbüslər və tematik yay məktəbləri çərçivəsində təlim və təcrübə hərəkətliliyinin artırılması.

- Ali təhsil sahəsindəki qanunvericilik, tənzimləmələr və struktur modelləri ilə bağlı qarşılıqlı təcrübə mübadiləsinin həyata keçirilməsi.

Aysel Mətləb

TodayPress TV