Çin onların HƏR ADDIMINI İZLƏYİR...

ABŞ ilə İran arasında mümkün münaqişə Vaşinqtonun hərbi və strateji zəifliklərini üzə çıxarır və ABŞ-nin ən böyük rəqibi olan Çin bundan özü üçün mühüm nəticələr çıxarır.

TodayPress TV xəbər verir ki, bu barədə “Politico”da ABŞ-nin  hazırkı və sabiq hərbi rəsmilərinə istinadən dərc olunan yazıda bildirilib.

Məqalədə qeyd olunur ki, Çin ABŞ-ın İranın blokadasını yarmaqda çətinlik çəkməsini və öz hücum potensialını genişləndirməkdə davam etməsini yaxından izləyir. Tramp administrasiyası isə ABŞ ictimaiyyəti tərəfindən geniş dəstək görməyən münaqişədən çıxış yolları axtarır. Bu arada qlobal neft qiymətləri yüksəlir və Pentaqonun strateji sənədləri göstərir ki, Pekinlə rəqabət artıq əsas prioritetlərdən biri deyil.

ABŞ və Çin liderlərinin görüşü yaxınlaşdıqca, qeyri-müəyyən atəşkəsin davam etməsi, müttəfiqlərin ABŞ-a dəstək verməkdə tərəddüd etməsi və Tramp üçün siyasi risk yaradan müharibə ssenariləri fonunda sabiq və hazırkı hərbi rəsmilər “kartların Çinin əlində olacağı” barədə narahatlıqlarını ifadə ediblər.

Məqalədə həmçinin qeyd olunur ki, Çin onilliklər boyu ABŞ ordusunun fəaliyyətini izləyib və geniş araşdırmalar aparıb.

“Onlar bizim necə güc tətbiq etdiyimizi bilirlər. Çinlilər bizim tankerlərdən və hərbi bazalardan asılılığımızdan yaxşı xəbərdardırlar. Onlar aviazərbələrin necə endirildiyini, qeyri-kinetik əməliyyatları, elektron müharibəni və kiber sahədə aparılan mübarizəni, ümumilikdə isə hər şeyi yaxından öyrəniblər”, – deyə keçmiş Pentaqon rəsmisi bildirib.

Onun sözlərinə görə, Çin tərəfi yaxşı anlayır ki, İranla müharibədə istifadə olunan heç bir raket Hind-Sakit okean regionunda ABŞ-ın Çinə qarşı çəkindirici gücünü əhəmiyyətli şəkildə artırmayacaq.

Jalə Rövşən 

TodayPress TV