At ili nə vəd edir? - "Kəşflər və innovasiyalar ili..."

2026-cı il Şərq təqviminə görə alovlu At ilinə təsadüf edir. Astroloji baxımdan bu ilin yüksək dinamika, sürət və təşəbbüskarlıqla yadda qalacağı gözlənilir. 

Mövzu ilə bağlı astroloq Sabirə Cəfər TodayPress TV-yə açıqlamasında bildirib ki, At ilinin enerjisi qırmızı tonlar, impulsivlik, aktivlik və hərəkətliliklə səciyyələnir.

Bu dinamika Saturnun Qoç bürcünə keçidi ilə üst-üstə düşərək ilin ümumi enerjisini daha da gücləndirir:

"2026-cı il yeniliklər, kəşflər və cəsarətli addımlarla assosiasiya olunan bir il olacaq. Elm və texnologiyada, incəsənətdə, gündəlik həyatda və fərdi talelərdə yeni başlanğıclar ön plana çıxa bilər. Saturnun Qoç bürcündə simvolik mənası köhnə maneələrin aşılması, sərhədlərin dağıdılması və irəliləyişlə bağlıdır. Neptunun Qoça keçidi insanlığın indiyədək xəyal belə etmədiyi mövzularda yeni ideyaların, kəşflərin və innovativ yanaşmaların ortaya çıxmasına zəmin yarada bilər".

Astroloq əlavə edib ki, astroloji proqnozlara əsasən, 2026-cı ilin ən şanslı bürcləri də müəyyənləşir. Belə ki, ilin ilk yarısında Xərçəng bürcləri, ilin ikinci yarısında isə Şir bürcləri daha çox fürsətlərlə qarşılaşa bilərlər. Bunun əsas səbəbi Yupiterin bu bürclər üzərindən tranzit etməsidir:

"Yupiterin bu mövqeyi təxminən 12 ildən bir baş verdiyi üçün Xərçəng və Şir bürcləri üçün şanslı dövr uzun fasilədən sonra yenidən aktivləşir. Eyni zamanda Saturnun Qoç bürcünə keçidi Qoçlar üçün də xüsusi əhəmiyyət daşıyır. Təxminən 29,5 ildən sonra Saturn dövrəsinin tamamlanması bu bürcün nümayəndələrinin həyatında köklü dəyişikliklərə yol aça bilər. Bu dəyişikliklər evlilik, yeni iş və karyera imkanları, həyat tərzinin yenilənməsi və ya övlad sahibi olmaq kimi mühüm hadisələrlə müşayiət oluna bilər".

Ekspert tarixi paralellərə də diqqət çəkərək bildirib ki, Neptunun sonuncu dəfə Qoç bürcündən keçdiyi dövrdə yanğınsöndürmə texnikaları, xüsusi alətlər və termometrlər kimi mühüm ixtiralar ortaya çıxmışdı. Bu baxımdan növbəti tranzit dövründə də elmi və texnoloji sahədə yeniliklərin gözlənildiyi vurğulanır.

Sabirə Cəfər əlavə edib ki, Saturnun Qoç tranzitləri tarixən müstəmləkəçiliyə, köhnə güc strukturlarına və əsarətə qarşı qalxmalarla da əlaqələndirilir. Bu proseslər Plutonun Dolça, Uranın isə Əkizlər bürcünə keçidi fonunda daha da güclənir:

"2026-cı ilin planet tranzitləri ilə zəngin olması dünya miqyasında güc balansında, idarəetmə mexanizmlərində və siyasi münasibətlərdə ciddi dəyişikliklərin baş verə biləcəyinə işarə edir".

Türkan İsgəndərli

TodayPress TV