Moskvada işlər qarışdı: Lavrov ABŞ-dən küsdü
Moskvada böhran dərinləşir. Xarici işlər naziri Sergey Lavrov açıq deyir ki, Donald Tramp Rusiyanı aldadıb tələyə saldı.
Kremldə gərginlik dalğası pik həddə çatıb. Rəsmilər Putinin on ildən sonra ABŞ-yə ilk səfəri olan 2025-ci ilin avqust ayında keçirilən tarixi Ankoric (Anchorage) sammiti ilə bağlı açıq panikadadılar.
Lavrov mətbuat brifinqində Alyaska danışıqlarını Ukraynanın yenidən silahlanması üçün vaxt qazanmaq məqsədilə hazırlanmış aldadıcı tələ kimi qiymətləndirib.
Moskva əvvəlcə qısa müddətdə sülh sazişi və sanksiyaların ləğvini əldə etdiyini düşünürdü. Lakin Tramp administrasiyası tam əksini etdi: nəinki münaqişəni "donduraraq" Ukraynaya dünyanın ən innovativ pilotsuz uçuş aparatları (PUA) üzrə müdafiə sənayesini qurmağa imkan verdi, həm də Bayden dövrünün bütün sanksiyalarını qüvvədə saxladı və üstəlik yeni, ağır məhdudiyyətlər paketi tətbiq etdi.
İndi G7 ölkələrinin liderləri açıq şəkildə Rusiyanın qələbə şansının sıfıra yaxın olduğunu bəyan edirlər. Sosial mediada isə "milyarderin arvadını öz qızı ilə səhv salan adamın oyununa düşmək" kimi ifadələrlə Moskvanın geosiyasi uğursuzluğu əfsanəvi səviyyədə müzakirə olunur.
2025-ci il avqustun 15-də Alyaska ştatının Ankoric şəhərində keçirilən Tramp–Putin görüşü Kreml tərəfindən böyük diplomatik uğur kimi qələmə verilmişdi. Rusiya rəsmiləri "Ankoric ruhu" və "Ankoric anlaşmaları" ifadələrini tez-tez işlədərək, guya Ukrayna məsələsində əsas razılaşmalar əldə olunduğunu iddia edirdilər. Lakin aylar keçdikcə vəziyyət dəyişdi. Lavrov və digər Kreml nümayəndələri artıq Vaşinqtonu "anlaşmalardan imtina etməkdə" və "vaxt qazanmaq üçün danışıqlardan istifadə etməkdə" ittiham edirlər.
Rusiya tərəfi hesab edir ki, sammitdən sonra gözlənilən sülh irəliləyişi əvəzinə Ukrayna Qərbin dəstəyi ilə hərbi potensialını gücləndirib. Moskva daxilində narazılıq və ittihamlar artıb. Bəzi analitiklər deyir ki, Kreml Trampın "sürətli sülh" vədlərinə arxalanaraq, real danışıqlar masasında üstünlük əldə edəcəyini düşünmüşdü.
Sanksiyaların qüvvədə saxlanılması, Ukraynanın hərbi innovasiyaları və Qərbin birliyi Rusiyanın "qələbə" strategiyasını ciddi şəkildə sual altına qoyur. Lavrov kimi Rusiya siyasi həyatında vacib adamın acı şikayətləri Kreml daxilində narahatlığın dərinliyini ortaya qoyur.
Jalə Rövşən
