Aleksandr Şarovski – Səhnəyə həsr olunan ömrün hekayəsi

Aleksandr Yakovleviç Şarovski 10 fevral 1948-ci ildə Bakıda anadan olub.

Azərbaycan teatrının tanınmış aktyor və rejissorlarından biri olan Şarovski 1967-ci ildə səhnəyə çıxıb və ömrünün böyük hissəsini teatr sənətinə həsr edib. O, Azərbaycan Dövlət Gənc Tamaşaçılar Teatrında aktyor kimi fəaliyyətə başladıqdan sonra Azərbaycan Dövlət Akademik Rus Dram Teatrında çalışıb. Burada aktyor, rejissor assistenti, quruluşçu rejissor və baş rejissor kimi müxtəlif vəzifələrdə fəaliyyət göstərib. 1973-cü ildə Azərbaycan Dövlət Xarici Dillər İnstitutunu bitirib.

Şarovski 1991-ci ildən quruluşçu rejissor, 1993-cü ilin martından isə Rus Dram Teatrının baş rejissoru olub. O, uzun illər teatrın əsas simalarından biri kimi fəaliyyət göstərib. Səhnədə 50-dən çox obraz yaradıb, 50-dən artıq tamaşaya quruluş verib. Rejissor kimi Azərbaycanla yanaşı, Rusiya və Ukraynada da tamaşalar hazırlayıb.

Onun teatr fəaliyyətindən əvvəl futbolla da məşğul olduğu bildirilir. Gənclik illərində Bakı “Dinamo” və “Lokomotiv” komandalarında çıxış edib, Azərbaycan gənclər yığmasının heyətində yer alıb. Lakin aldığı zədə futbolçu karyerasını davam etdirməsinə imkan verməyib və bundan sonra həyatını tamamilə teatra bağlayıb.

Şarovski 1988-ci ildə Əməkdar artist, 1998-ci ildə isə Azərbaycanın Xalq artisti fəxri adına layiq görülüb. 2008-ci ildə “Şöhrət”, 2018-ci ildə “Şərəf” ordeni ilə təltif edilib. 2023-cü ildə Azərbaycan teatr sənətinin inkişafındakı xidmətlərinə görə Prezidentin fəxri diplomunu alıb.

Şarovskinin ilk həyat yoldaşı ilə məhz teatrda tanış olduğu bildirilir. Bu nikahdan bir oğlu dünyaya gəlib. Sonradan cütlük ayrılıb. Altı nəvəsi isə İsraildə yaşayır. 

Şarovskinin ikinci həyat yoldaşı Azərbaycanın Xalq artisti, aktrisa Nataliya Şarovskaya da uzun illər Rus Dram Teatrında fəaliyyət göstərib. 

Aktyorun fəaliyyəti yalnız teatrla məhdudlaşmayıb. O, uzun illər Bakı Avropa Yəhudiləri Dini İcmasının sədri kimi də fəaliyyət göstərib. Bu istiqamətdə Azərbaycanda dini tolerantlıq və müxtəlif icmalar arasında münasibətlərin inkişafı ilə bağlı ictimai fəaliyyət göstərib.

Dahi sənətkar 2026-cı il sentyabrın 9-da 78 yaşında vəfat edib.

Jalə Rövşən