Ürəyiniz belə döyünürsə, DİQQƏTLİ OLUN – Təhlükənin əlaməti ola bilər!

Ürək ritminin pozulması, tibbi dildə aritmiya, ürəyin normadan daha sürətli, yavaş və ya nizamsız döyünməsi ilə xarakterizə olunan vəziyyətdir. Bəzi hallarda aritmiya ciddi təhlükə yaratmasa da, müəyyən ritm pozğunluqları həyati risk daşıya bilər.

Aritmiyanın əsas əlamətləri hansılardır?

Ürək ritminin pozulması zamanı insan ürəkdöyünmə, sinədə çırpınma hissi, başgicəllənmə, halsızlıq, nəfəs darlığı və tez yorulma kimi əlamətlərlə qarşılaşa bilər. Bəzən isə aritmiya heç bir əlamət vermədən, təsadüfi tibbi müayinə zamanı aşkarlanır.

Aritmiya nədən yaranır?

Ürək ritminin pozulmasına stress, yuxusuzluq, həddindən artıq kofein qəbulu, siqaret, alkoqol, qalxanabənzər vəzinin xəstəlikləri və orqanizmdə elektrolit balansının pozulması səbəb ola bilər. Bununla yanaşı, ürək-damar xəstəlikləri və bəzi dərman preparatları da aritmiyaya yol aça bilər.

Nə vaxt həkimə müraciət etmək lazımdır?

Ürəkdöyünmə tez-tez təkrarlanırsa, uzun müddət davam edirsə və ya başgicəllənmə, halsızlıq, nəfəs darlığı ilə müşayiət olunursa, kardioloqa müraciət etmək vacibdir.

Sinədə güclü ağrı, ciddi nəfəs darlığı, huşun itirilməsi və ya bayılma ilə müşayiət olunan ürək ritmi pozğunluğu zamanı isə dərhal təcili tibbi yardım çağırılmalıdır.

Aritmiyanın qarşısını necə almaq olar?

Ürək sağlamlığını qorumaq üçün düzgün qidalanmaq, müntəzəm fiziki aktivliklə məşğul olmaq, kifayət qədər yatmaq, siqaretdən uzaq durmaq və kofein qəbulunu məhdudlaşdırmaq tövsiyə edilir. Mövcud ürək xəstəliklərinin vaxtında müalicəsi də mühüm əhəmiyyət daşıyır.

Aritmiyanın diaqnostikasında elektrokardioqramma (EKQ), Holter monitorinqi və digər müayinələrdən istifadə olunur. Müalicə isə ritm pozğunluğunun növündən və yaranma səbəbindən asılı olaraq müəyyən edilir.

Unutmayın: Ürək ritminin hər dəyişməsi təhlükəli deyil. Lakin davamlı və təkrarlanan ritm pozğunluqlarını diqqətsiz qoymaq ciddi fəsadlara səbəb ola bilər.

Kübra Musayeva