Dəmir çatışmazlığından əziyyət çəkənlər üçün vacib məsləhətlər

Daimi yorğunluq, başgicəllənmə, halsızlıq və dərinin solğunlaşması orqanizmdə dəmir çatışmazlığının əlamətləri ola bilər. Dəmir hemoqlobinin yaranması və oksigenin bədən boyunca daşınması üçün vacib mineraldır. Onun çatışmazlığı dəmir defisiti anemiyasına səbəb ola bilər.

Dəmirlə zəngin qidalar hansılardır?

Mal əti, balıq, toyuq, yumurta, mərcimək, lobya, noxud və balqabaq tumları dəmir mənbələridir. Heyvan mənşəli məhsullardakı dəmir, adətən, bitki mənşəli qidalardakı dəmirlə müqayisədə daha asan mənimsənilir.

Dəmirin sorulmasını necə artırmaq olar?

C vitamini dəmirin mənimsənilməsinə kömək edir. Buna görə mərcimək və lobya kimi qidaları limon, bolqar bibəri, pomidor və ya portağalla birlikdə qəbul etmək faydalıdır.

Çay və qəhvəni yeməklə eyni vaxtda içməmək məsləhətdir. Onların tərkibindəki maddələr bitki mənşəli dəmirin sorulmasını azalda bilər. Bu içkiləri yeməkdən təxminən 1–2 saat əvvəl və ya sonra qəbul etmək məqsədəuyğundur.

Nə zaman həkimə müraciət edilməlidir?

Halsızlıq, başgicəllənmə və ürəkdöyünmə davam edərsə, həkimə müraciət etmək lazımdır. Qanın ümumi analizi və ferritin testi dəmir çatışmazlığının müəyyənləşdirilməsinə kömək edə bilər.

Dəmir preparatlarını analiz və həkim məsləhəti olmadan qəbul etmək düzgün deyil. Çünki dəmir çatışmazlığının səbəbini müəyyənləşdirmək və uyğun müalicə seçmək vacibdir.

Kübra Musayeva