Yaponiya 2026-cı il üçün rekord həddə müdafiə büdcəsini təsdiqlədi

Bölgədə artan gərginlik və Çindən gələn təhdid fonunda Yaponiya 2026-cı il üçün rekord büdcəni təsdiqləyib və müdafiəyə böyük məbləğ ayırıb.

TodayPress TV xəbər verir ki, bu barədə "Associated Press" məlumat yayıb.

Nəşrin məlumatına görə, Yaponiya Nazirlər Kabineti növbəti maliyyə ili üçün 785 milyard dollar (122,31 trilyon yen) məbləğində büdcə layihəsini təsdiqləyib ki, bunun da 9 trilyon yendən (58 milyard dollar) çoxu müdafiəyə gedəcək.

Bu, 2025-ci il xərcləri ilə müqayisədə 9,4% çoxdur və müdafiə xərclərini  ümumi daxili məhsulun (ÜDM) 2%-nə qədər ikiqat artırmaq üçün dörd illik proqramı davam etdirir və hədəfi iki il irəli aparır.

Qeyd edək ki, yeni büdcənin bir hissəsi olaraq, Yaponiya raket imkanlarının inkişafına 970 milyard yen (6,2 milyard dollar) və sahil müşahidəsi və müdafiəsi üçün nəhəng "SHIELD" dron sisteminin yaradılmasına 100 milyard yen (640 milyon dollar) ayırmağı planlaşdırır.

Planlara, həmçinin 2028-ci ilə qədər hava, dəniz və sualtı dronların yerləşdirilməsi daxildir.

Bildirilib ki, xərclərin artması Çinlə artan gərginlik, Tayvan üçün mümkün təhdidlər, əhalinin yaşlanması və hərbi personalın çatışmazlığı ilə əlaqədardır.

Aysel Mətləb

TodayPress TV