Oyun avtomatları qadağan edilə bilər

Honkonq hökuməti oyuncaqlar və müxtəlif mükafatlar verən oyun avtomatlarının fəaliyyətini tənzimləmək üçün lisenziyalaşdırma sistemi təklif edib.

TodayPress TV xəbər verir ki, bu barədə “South China Morning Post” məlumat yayıb.

Bu addım yeniyetmələr arasında qumar asılılığının artması və əyləncə ilə qumar arasındakı sərhədin bulanması ilə bağlı narahatlıqlardan sonra atılıb.

Məsələnin əsası 2022-ci ildə qəbul edilən məhkəmə qərarından qaynaqlanır. Həmin qərar operatorları lisenziya almaqdan azad edib və bundan sonra şəhərdə oyun avtomatlarının sayı sürətlə artmışdı. Bəzi sahibkarların bahalı mükafatlar təklif etməsi və “geri alma” tipli nağd pul sistemləri tətbiq etməsi vəziyyəti daha da gərginləşdirib.

Yeni təklifə görə, oyun avtomatlarında bir oyunun qiyməti təxminən 0,64 dollarla məhdudlaşdırılacaq, maksimum mükafat dəyəri isə 38 dolları keçməyəcək. Bundan əlavə, operatorlar qumar asılılığı ilə bağlı xəbərdarlıqlar yerləşdirməli olacaqlar.

Türkan İsgəndərli

TodayPress TV