Güclü külək avtomobilləri MƏHV ETDİ - Zərəri kim ödəməlidir?

Paytaxtda müşahidə olunan güclü küləyin təsirindən çoxmərtəbəli binanın fasad örtüyü uçub. Nəticədə bir çox avtomobilə zərər dəyib.

Bəs bu ziyanı kim qarşılamalıdır?

Mövzu ilə bağlı TodayPress TV-yə danışan hüquqşünas Ramil Süleymanov bildirib ki, binaların damından və ya üzlüyündən qopan hər hansı hissənin avtomobilin üzərinə düşməsi nəticəsində dəymiş zərər mütləq şəkildə ilkin olaraq hüquq-mühafizə orqanları tərəfindən araşdırılmalıdır.  

Onun sözlərinə görə, araşdırma zamanı hadisənin hansı səbəbdən baş verdiyi müəyyən olunur:

"Əgər araşdırma nəticəsində avtomobilə dəyən zərərin vətəndaşın ehtiyatsız davranışı ucbatından baş verdiyi məlum olarsa, həmin şəxs barəsində izahat alınır və cinayət işinin başlanmasının rədd edilməsi barədə qərar qəbul olunur. Bu halda məsuliyyət məsələsi həmin qərarda öz əksini tapır".

Hüquqşünas vurğulayıb ki, əgər zərər binanı idarə edən qurumun məsuliyyətsizliyi nəticəsində, yəni binanın damından və ya üzlüyündən qopan hissənin avtomobilin üzərinə düşməsi səbəbindən dəyibsə, bu zaman məsuliyyət birbaşa binanın idarəçiliyinə cavabdeh olan şəxsin üzərinə düşür.

"Belə hallarda da vətəndaşın şikayəti əsasında hüquq-mühafizə orqanları tərəfindən araşdırma aparılır və düşən hissənin binaya aid olub-olmadığına aydınlıq gətirilir".

Ramil Süleymanov qeyd edib ki, avtomobilinə zərər dəymiş şəxs binanı idarə edən quruma qarşı mülki qaydada iddia qaldıraraq dəymiş ziyanın ödənilməsini tələb etmək hüququ qazanır.

Türkan İsgəndərli

TodayPress TV