Tramp Zelenskiyə “mikrofonu başqasına ver” dedi

ABŞ Prezidenti Donald Tramp Ukrayna Prezidenti Volodimir Zelenskini tənqid edərək, müharibənin daha əvvəl başa çatdırıla biləcəyini və Kiyevin daha sərfəli razılaşma əldə etmək imkanının olduğunu bildirib.

TodayPress TV xəbər verir ki, Trampın sözlərinə görə, Zelenski onun tövsiyələrinə qulaq assaydı, müharibə çoxdan başa çata bilərdi.

“Zelenski nə danışdığından xəbərsizdir. O, bu müharibəni çoxdan bitirməli idi. Əgər mənə qulaq assaydı, daha sərfəli razılaşma əldə edə bilərdi və Ukrayna tərəfdən bir milyon nəfər daha az həlak olardı”, – Tramp bildirib.

ABŞ Prezidenti hesab edir ki, artıq Ukrayna adından danışıqları başqa bir şəxsin aparmasının vaxtı çatıb. O, cəbhə xəttində ciddi dəyişiklik olmadığını, bununla yanaşı, çox sayda insanın həyatını itirdiyini iddia edib.

Tramp həmçinin Ukraynanın kişi əhalisinin itkilər verdiyini vurğulayıb və Zelenskinin onunla daha əvvəl razılaşmalı olduğunu deyib. O, Ağ Evdə Zelenski ilə baş tutan görüşü xatırladaraq, həmin vaxt onun təkliflərini qəbul etsəydi, vəziyyətin çoxdan həll edilə biləcəyini irəli sürüb.

Qeyd edək ki, Trampın səsləndirdiyi itkilərlə bağlı rəqəmlər onun öz iddiasıdır və mətndə müstəqil şəkildə təsdiqlənməyib.

Kübra Musayeva