"Bakı Metropoliteni"ndən DEPUTATA CAVAB: Həmin işçilərin…
Bakı Metropolitenində sərnişindaşıma xidmətinin yüksək keyfiyyətlə təşkili, təhlükəsizlik və xidmət mədəniyyətinin artırılması əsas prioritetlərdən olsa da, insan resursları və onların səmərəliliyi və dayanıqlı fəaliyyətinə önəm verilir.
Bu barədə TodayPress TV-nin sorğusuna cavab olaraq qurumdan bildirilib.
Qeyd dolunub ki, bu məqsədlə müəssisənin fəaliyyət məqsədlərinə uyğun olmayan, həmçinin tikinti və tikinti ilə bağlı yardımçı strukturların saxlanılması və idarə edilməsi istiqamətində optimallaşdırma tədbirləri həyata keçirilib.
Aparılan optimallaşdırma tədbirlərinə əsasən, QSC-nin bilavasitə əsas fəaliyyət növünə aid olmayan bəzi sahələr daha ixtisaslaşmış və peşəkar şirkətlərə həvalə edilib.
Həyata keçirilmiş struktur optimallaşdırılması ilə 275 işçi üzrə yerləşdirmə prosesi aparılıb. Onlardan 34 nəfər müəssisənin daxili strukturlarında yerləşdirilib. 181 nəfər fəaliyyət istiqamətinə uyğun olaraq, ixtislaşmış qurumlarda işlə təmin edilib. 60 nəfərə isə məşğulluğun təmin edilməsi mümkün olmayıb.
"Xüsusi qeyd etmək istərdik ki, optimallaşdırma prosesi zamanı əməkdaşlarla açıq və şəffaf kommunikasiya təmin edilməklə, görülən tədbirlər barədə işçilər mərhələli şəkildə əvvəlcədən məlumatlandırılıb. Proses Azərbaycan Respublikasının əmək qanunvericiliyinin tələblərinə tam uyğun şəkildə həyata keçirilib.
Əmək münasibətlərinə xitam verilən şəxslərə qanunvericiliklə nəzərdə tutulmuş bütün ödənişlər və sosial təminatlar tam həcmdə ödənilib. Bununla yanaşı, işçilərin məşğulluq imkanlarının genişləndirilməsi məqsədilə aidiyyəti dövlət qurumları, o cümlədən DOST mərkəzləri ilə əməkdaşlıq çərçivəsində müvafiq dəstək tədbirləri görülüb", - deyə məlumatda vurğulanıb.
Xatırladaq ki, Milli Məclisin deputatı Fazil Mustafa ölkədə həyata keçirilən ixtisarlardan da bəhs edib. O bildirib ki, bir sıra qurumlarda, o cümlədən Metropolitendə, “Azərbaycan Xəzər Dəniz Gəmiçiliyi” QSC-də ixtisarlar həyata keçirilib. Metropolitendə ixtisar edilən 100-dək işçiyə başqa yerdə iş veriləcəyi vəd olunsa da, bu, həllini tapmayıb.
Türkan İsgəndərli
