Azərbaycan yaşıl enerj sahəsində REGİONAL LİDERƏ çevrilir

“Azərbaycanın bərpaolunan enerji potensialı kifayət qədər yüksəkdir və bu sahə artıq təkcə ekoloji deyil, həm də strateji-iqtisadi üstünlük kimi çıxış edir”.

Bu fikirləri TodayPress TV-yə açıqlamasında Milli Məclisin deputatı Vüqar Bayramov deyib.

Deputat bildirib ki, “Gülüstan” sarayında Səudiyyə Ərəbistanı Krallığının ACWA Power şirkəti tərəfindən inşa edilmiş 240 MVt gücündə “Xızı-Abşeron” Külək Elektrik Stansiyasının açılış mərasimində Azərbaycan Prezidenti İlham Əliyev Azərbaycanın yaşıl enerji üzrə potensialını konkret rəqəmlərlə ifadə edib. Onun sözlərinə görə, təkcə ölkənin külək enerjisi potensialı 150 giqavatdan artıqdır.

Vüqar Bayramov qeyd edib ki, 2030-cu ilədək bərpaolunan enerjinin ümumi istehlakda payının 30 faizə çatdırılması hədəfi Azərbaycanın yaşıl enerji strategiyasının əsas sütunlarından biridir. Onun sözlərinə görə, ölkənin ümumi yaşıl enerji potensialı 27 min MVt olaraq qiymətləndirilir ki, bunun 23 min meqavatı günəş enerjisinin payına düşür.

Deputat vurğulayıb ki, Azərbaycan regionda yaşıl enerji istehsalına ən çox sərmayə cəlb edən ölkədir. Son illərdə bu sahəyə 1 milyard ABŞ dollarından çox investisiya yönəldilib. Bu sərmayələr təkcə ölkə daxilində deyil, bütövlükdə regionda enerji effektivliyinin yüksəldilməsinə xidmət edir:

“Rəqəmlər və beynəlxalq müqayisələr göstərir ki, Azərbaycan yaşıl enerji və enerji səmərəliliyinin artırılması sahəsində regionun lider ölkələrindən biridir”.

Vüqar Bayramovun sözlərinə görə, alternativ enerjidən istifadə iqtisadi baxımdan da mühüm əhəmiyyət daşıyır. Hazırda illik 13 milyard kubmetr daxili qaz istehlakı olan Azərbaycanda yeni yaşıl enerji güclərinin istismara verilməsi 2030-cu ildə 1,2 milyard kubmetr təbii qaza qənaət etməyə imkan verəcək.

Deputat qeyd edib ki, qaz istehlakının təxminən 5 milyard kubmetri əhalinin payına düşür və istilik sistemlərində yaşıl enerjidən istifadənin genişlənməsi qaz sərfiyyatının azalması deməkdir:

“Bu, bir tərəfdən ümumi istehlakda yaşıl enerjinin payını artırır, digər tərəfdən isə qaz ixracını genişləndirməklə ölkəyə əlavə valyuta axını yaradır. Nəticədə həm ekoloji fayda əldə olunur, həm də qaz istehlakı optimallaşdırılır”.

Deputat hesab edir ki, alternativ enerjidən istifadə yalnız ekoloji və yaşıl iqtisadiyyat prinsipləri baxımından deyil, eyni zamanda iqtisadi potensialın genişləndirilməsi və enerji təhlükəsizliyinin gücləndirilməsi baxımından da strateji əhəmiyyət daşıyır.

Qiymət Mahir

TodayPress TV