Rusiyaya "işləməkdə" şübhəli bilinən şəxslər Polşada yaxalandı

Polşada Rusiya xüsusi xidmət orqanlarının xeyrinə casusluq və təxribat fəaliyyəti göstərməkdə şübhəli bilinən iki Ukrayna vətəndaşı saxlanılıb.

TodayPress TV xəbər verir ki, bu barədə Polşanın xüsusi xidmət orqanları üzrə nazir-koordinatoru Tomaş Semonyak məlumat verib.

Onun sözlərinə görə, əməliyyat Mazoviya voyevodalığında keçirilib. Saxlanılan şəxslərin 24 və 25 yaşlarında olduğu bildirilir.

Məlumata görə, şübhəlilər Polşadakı kritik infrastrukturu və hərbi obyektləri müəyyənləşdirərək onların fotoşəkillərini çəkiblər. Onlar, həmçinin nəqliyyat vasitələrini yandırmaqda şübhəli bilinirlər.

Saxlanılan şəxslər barəsində üç aylıq həbs-qətimkan tədbiri seçilib.