Ev tikmək istəyənlərin DİQQƏTİNƏ! Tikinti materialları bahalaşacaq

“Dəmir armatur və şüşə tikintidə əsas materiallar olduğuna görə onların idxalına əlavə gömrük yığımları tətbiq edilməsi qiymətləri yüksəldə bilər”.  

Bu fikirləri TodayPress TV-yə açıqlamasında iqtisadçı Akif Nəsirli yeni gömrük rüsumlarından danışarkən deyib.

O bildirib ki, bu qərar tikinti bazarında xərclərin artmasına səbəb ola bilər:

"İdxalçılar artan xərcləri kompensasiya etmək üçün məhsulların satış qiymətini qaldıra, bu da tikinti şirkətlərinin ümumi maya dəyərini artıra bilər. Nəticədə yeni tikilən binaların, xüsusən də mənzillərin qiymətlərində artım ehtimalı yaranır. Xüsusilə idxaldan asılı olan layihələrdə bu təsir daha çox hiss oluna bilər". 

İqtisadçı əlavə edib ki, digər tərəfdən, bu addım yerli istehsalçıları qorumaq və daxili istehsalı stimullaşdırmaq məqsədi daşıyırsa, uzun müddətdə bazarda yerli materialların payı arta və qiymət artımının təsiri zəifləyə bilər:

"Qısamüddətli dövrdə isə tikinti sektorunda müəyyən durğunluq, bəzi layihələrin gecikməsi və ya daha bahalı şərtlərlə həyata keçirilməsi ehtimalı mövcuddur. Bu da alıcılar üçün mənzilə çıxışın bir qədər çətinləşməsinə səbəb ola bilər".

Qeyd edək ki, dəmir armaturlar və şüşə listlər üçün müvəqqəti əlavə gömrük yığımları müəyyənləşib. Baş nazir Əli Əsədov bununla bağlı qərar imzalayıb. Qərara əsasən, dəmirdən və ya aşqarlanmamış poladdan çubuqların (dəmir armaturlar) 1 tonu üçün 150 manat, müxtəlif nomenklatur kodlar altında təsnif olunmuş şüşə listlərin 1 tonu üçün isə 100 manat gömrük yığımları tətbiq ediləcək.

Türkan İsgəndərli

TodayPress TV