Avtobusda namaz qılan sürücünü KƏSKİN TƏNQİD ETDİLƏR

Son günlər avtobusda namaz qılan sürücü ilə bağlı yayılan görüntülər və müzakirələr ictimaiyyət arasında geniş rezonans doğurub. Sosial şəbəkə istifadəçilərinin bir qismi bunu normal qarşılamazkən, digərləri sürücülər üçün lazımi şəraitin yaradılmadığını düşünür.

Məsələ ilə bağlı TodayPress TV-yə danışan nəqliyyat eksperti Raqif Raufoğlu mövzuya münasibət bildirərək bunun kifayət qədər həssas məsələ olduğunu qeyd edib. 

Onun sözlərinə görə, sürücünün ibadət etməsinə görə kimsənin ona irad bildirməsi doğru deyil:

"Düşünmürəm ki, kimsə çıxıb desin ki, "Sən niyə namaz qılırsan?" Heç kim buna görə irad bildirə bilməz. Əsas narazılıq ibadətin özünə deyil, onun icra formasına yönəlib. Heç bir ibadət konkret olaraq beş dəqiqəlik dəqiq vaxta bağlı deyil, müəyyən vaxt intervalı mövcuddur və bu müddət ərzində sürücü digər şəxsi ehtiyaclarını ödədiyi kimi, ibadətini də yerinə yetirə bilər. Onların şəxsi vaxtı mütləq olmalıdır və o vaxtdan istifadə etməlidirlər".

Ekspertin fikrincə, cəmiyyətdə qıcıq yaradan əsas məqam sürücünün sərnişinlər avtobusda ola-ola nəqliyyat vasitəsini saxlaması və ibadəti bu şəkildə həyata keçirməsidir:

"Sərnişinlər avtobusda ola-ola dayanıb "gözləyin, mənim ibadət vaxtımdır" demək düzgün deyil. Hər işin öz iş vaxtı var, hər bir insanın da şəxsi inancı hörmətlə qarşılanmalıdır. Amma bu, nümayişkaranə olmamalıdır. Ölkədə bir çox iş yerlərində, eləcə də ictimai məkanlarda namaz otaqlarının mövcudluğu normal haldır. Avtobus sürücülərinin də xüsusilə son dayanacaqlarda və fasilə vaxtlarında bu ehtiyaclarını ödəmələri üçün şəraitin olması vacibdir".

Sonda Raqif Raufoğlu bildirib ki, hadisənin hansı konkret şəraitdə baş verdiyi tam məlum olmadığından sürücünü birbaşa qınamaq düzgün olmaz, lakin ümumi yanaşma baxımından sərnişinlərin olduğu avtobusda bu formada davranış doğru hesab edilmir.

Türkan İsgəndərli

TodayPress TV