Satqınlar Paşinyana "satqın" deyir - Ermənistanda hava qarışıb

Ermənistan növbəti parlament seçkilərinə hazırlaşır. Seçkilər proporsional sistemlə keçiriləcək, yəni bütün ölkə vahid dairə sayılır və partiyalar siyahıları ilə yarışacaq.

Partiyalar üçün minimum dörd faiz, iki və ya üç partiyalı bloklar üçün isə səkkiz faiz baryer müəyyənləşib. Əgər heç bir qüvvə sabit çoxluq qazana bilməsə, ikinci tur keçirilə bilər və qalibə əlavə mandatlar verilir. Parlamentdə minimum üç siyasi qüvvə təmsil olunmalıdır. Bu dəfə yarışa on doqquz siyasi qüvvə qatılıb. Hakim Vətəndaş Müqaviləsi partiyasının başında Baş nazir Nikol Paşinyan dayanır.

Əsas müxalifət qüvvələri arasında rusiyalı iş adamı Samvel Karapetyanın dəstəklədiyi Güclü Ermənistan, keçmiş prezident Robert Köçəryanın rəhbərlik etdiyi Ermənistan alyansı və oliqarx Qaqik Sarukyanın Çiçəklənən Ermənistan partiyası ön plana çıxır. Digər namizədlər arasında keçmiş ombudsman Arman Tatoyan, Hayk Marutyan və Edmon Marukyan kimi simalar da var.Son sorğulara görə Paşinyanın partiyası hələ də öndədir, lakin dəstəyi 26-33 faiz intervalında dəyişir.

Qərar verməmiş seçicilərin sayı xeyli çoxdur – 20-30 faizə qədər. Güclü Ermənistan ikinci yerdə 9-18 faizlə gedir, digər müxalifət qüvvələri isə daha aşağı nəticə göstərir. Paşinyan favorit hesab olunur, amma təkbaşına böyük çoxluq əldə etmək onun üçün asan olmayacaq. Əgər qərar verməmiş seçicilər onun tərəfinə keçsə və iştirak faizi yüksək olsa, Paşinyan yenidən hökuməti saxlaya bilər. Müxalifət birləşsə və ya daha çox səs toplasa, vəziyyət dəyişə bilər, lakin indiki parçalanma buna mane olur. Paşinyana qarşı tənqid dalğası güclüdür. 

Erməni mediası  açıq hücumları gücləndirib. Daha çox müxalifətyönlü televiziyalar, saytlar və sosial şəbəkələr Paşinyanı demək olar ki, hər gün “satqın”, “torpaq verən” və “xalqı satmış” siyasətçi kimi təqdim edir. Bir çox erməni mediası və ictimaiyyət onu 2023-cü ildə Qarabağ hadisələrindən, yüz minlərlə qaçqının gəlişindən, Azərbaycanla sülh danışıqlarından və Rusiyadan uzaqlaşma siyasətindən günahlandırır. Bəziləri bunu “xalqa xəyanət” kimi qiymətləndirir.

İqtisadi çətinliklər, korrupsiya iddiaları və müxalifətçilərə qarşı təzyiqlər də tənqidləri artırıb. Kilsə və xaricdəki erməni icmaları da Paşinyana qarşı sərt mövqedədir. Bir çox ekspertlər Rusiyanın Ermənistanda medianı seçki prosesi ərəfəsində ələ keçirdiyini deyir.

Hakimiyyətyönlü media isə bu tənqidləri qərbyönlü siyasətin nəticəsi kimi müdafiə etməyə çalışır.  Seçkiyə çox az - 18 gün qalıb. Gerisayım başlayıb. Getdikcə vəziyyət daha da gərginləşir. Hazırkı sorğular Paşinyanın iqtidarda qalma ehtimalını yüksək göstərsə də, qərar verməmiş seçicilərin davranışı və son həftələrdəki hadisələr nəticəni hələ də dəyişə bilər.

Jalə Rövşən