İki gün əvvəl Trampa qısqanıb Çinin gəmisini bombaladı - Putin Pekinə "əğyar" kimi endi

Rusiya Prezidenti Vladimir Putin 25-ci dəfə Çinə səfər etdi. Bu səfər həm də Rusiya–Çin arasında imzalanmış 25 illik strateji əməkdaşlıq müqaviləsinin yubileyinə təsadüf edir.  “Limitsiz dostluq” mesajı bir daha təkrarlandı və Trampdan sonrakı dövrdə Çin diplomatiyasının necə balans saxladığı yenidən diqqət mərkəzinə düşdü.

Putinin təyyarəsi Pekin vaxtı ilə saat 23:30-da paytaxta enəndə qırmızı xalça, fəxri qarovul və bayraq yelləyən uşaqlar artıq hazır vəziyyətdə idi. Sosial şəbəkələrdə "zarafat maşını" isə dərhal hərəkətə keçdi: “Trampdan sonra sevgini yoxlayır”, “qısqanc sevgili effekti” kimi zarafatlar sürətlə yayıldı. Çünki adətən bu saatlarda "qonaq" qarşılamırlar. 

Müqayisələr də gecikmədi. Trampı əvvəlki səfərlərində daha aşağı səviyyəli rəsmilər qarşılamışdı, Putini isə Çin Xarici İşlər Naziri Wang Yi şəxsən özü qarşıladı. Sosial mediada bununla bağlı “Trampa janitor, Putinə Politbüro”, “birinə metal pilləkən, digərinə qırmızı xalça” kimi ironik paylaşımlar viral oldu.

Səfərdən cəmi bir gün əvvəl isə diqqətçəkən başqa hadisə yaşanmışdı. Qara dənizdə Rusiyaya məxsus dron Çin yük gəmisi “KSL Deyang”ı vurdu. Hadisənin zamanlaması o qədər uğursuz idi ki, sosial mediada təəccüb reaksiyaları yayıldı. Ukraynalılar da fürsəti qaçırmayaraq “Terrible mistake?” zarafatını gündəmə daşıdılar. Çin tərəfi isə mövzunu  sakit şəkildə keçdi.

Səfərin ən emosional anı isə Putinin 2000-ci ildə Beihai Parkında 12 yaşlı Peng Pai ilə çəkilmiş köhnə fotosunun yenidən gündəmə gəlməsi idi.  Hazırda 38 yaşlı mühəndis olan Peng Pai, 26 ildən sonra Putinlə yenidən görüşdü. Həmin görüntülər Çin sosial mediasında ən çox paylaşılan və bəyənilən kadrlardan birinə çevrildi. 

Pekin də səfərə xüsusi hazırlıq görmüşdü. Şəhər “Zone-2” təhlükəsizlik rejiminə keçdi, yollar bağlandı, hava məkanı qismən məhdudlaşdırıldı, təhlükəsizlik tədbirləri maksimum səviyyəyə çatdırıldı. Sosial mediada zarafatla “Bütün Pekin Putin üçün dondurulub” deyənlər də oldu.

Putin öz zirehli “Aurus” limuzinlərini əvvəlcədən Çinə göndərmişdi. Təyyarənin yalnız Rusiya və Çin hava məkanından istifadə etməsi də diqqət çəkən təhlükəsizlik detalları arasında idi.

Nəticədə səfər  strateji birlik nümayişi ilə yadda qaldı. İki ölkə arasında ticarət dövriyyəsi artıq 200 milyard dolları keçib. Enerji layihələri, Ukrayna müharibəsi və İran məsələsi masada idi.  

Jalə Rövşən