Səma külə büründü - Etnadan 4 kilometrlik püskürmə

İtaliyanın Siciliya adasında yerləşən Etna vulkanı 4 kilometr hündürlüyə kül püskürüb.

TodayPress TV xəbər verir ki, bu barədə İtaliya Milli Geofizika və Vulkanologiya İnstitutunun (INGV) aviasiya bildirişində məlumat verilib.

Bildirilib ki, vulkanın püskürtdüyü kül buludu cənuba – Kataniya hava limanı istiqamətinə hərəkət edir.

Hava limanı üçün VONA beynəlxalq aviasiya təhlükəsizliyi təsnifatına əsasən qırmızı – ən yüksək təhlükə səviyyəsi elan edilib.

Qeyd edək ki, avqustun 8-də Siciliyada Etna vulkanının püskürməsi başlayıb. Vulkanın aktivləşməsi Voracine kraterindən lava axınının müşahidə olunması ilə müşayiət edilib.

Püskürmədən sonra bəzi turistlərin vulkanın yamaclarında lava axınlarına yaxınlaşmağa çalışdığı bildirilib.

Aysel Mətləb