Rubio: "İranın Hörmüz boğazına nəzarətinə imkan verilməyəcək"

"İran Hörmüz boğazında hansısa bir sistem qurmaqla hədələyir və orada bu beynəlxalq su yolundan kimin keçə biləcəyinə qərar verəcəklər. Biz buna icazə verməyəcəyik".

TodayPress TV  xəbər verir ki,  bunu  ABŞ dövlət katibi Marko Rubio "ABC" kanalına müsahibəsində deyib. 

O, neft daşımalarının əhəmiyyətli bir hissəsini bu marşrutdan istifadə edən ölkələrin, ilk növbədə, İranın təhdidlərindən narahat olmalı olduğunu vurğulayıb.

"Prezidentin bir neçə variantı var. Hərbi Nazirlik bu və yarana biləcək digər gözlənilməz halları həll etmək üçün prezidentə variantlar hazırlayır", – deyə ABŞ dövlət katibi əlavə edib.

Qeyd edək ki, dünya neftinin və mayeləşdirilmiş təbii qazın təxminən beşdə biri Fars körfəzini Oman dənizi ilə birləşdirən Hörmüz boğazından keçir. Martın əvvəlində İran, ABŞ-İsrail əməliyyatına cavab olaraq, İnqilab Keşikçilərinin kanalın nəzarətini ələ keçirdiyini və ABŞ və ya İsraillə əlaqəli hər hansı bir tankerə hücum etməklə hədələdiyini açıqlayıb. Daha sonra  isə İran parlamenti, ticarət gəmilərinin Hörmüz boğazından keçməsi üçün rüsum ödəməsini tələb edən yeni qanunun hazırlandığını elan edib.

Jalə Rövşən 

TodayPress TV