Əlamətsiz gələn təhlükə: Ürəyinizi və beyninizi hədəf alır
Yüksək qan təzyiqi (hipertoniya) dünyada ən geniş yayılmış sağlamlıq problemlərindən biridir. Xəstəliyin əsas təhlükəsi uzun müddət heç bir əlamət vermədən inkişaf etməsidir. Məhz buna görə hipertoniya çox vaxt “səssiz qatil” adlandırılır.
Yüksək təzyiqin əlamətləri hansılardır?
Hipertoniya əksər hallarda simptomsuz keçir. Lakin qan təzyiqi ciddi yüksəldikdə bəzi əlamətlər müşahidə oluna bilər:
• Güclü baş ağrısı
• Görmənin bulanıqlaşması
• Sinədə ağrı və sıxılma hissi
• Nəfəs darlığı
• Başgicəllənmə
Bu əlamətlər yalnız hipertoniyaya xas deyil və onların olmaması qan təzyiqinin normal olduğunu göstərmir.
Yüksək təzyiq niyə təhlükəlidir?
Nəzarətsiz qalan hipertoniya zamanla ürək, beyin, böyrək və qan damarlarına zərər verə bilər. Nəticədə infarkt, insult, ürək çatışmazlığı və böyrək xəstəliklərinin yaranma riski artır.
Kimlər risk altındadır?
Artıq çəkisi olanlar, az hərəkət edənlər, həddindən artıq duz qəbul edənlər və ailəsində hipertoniya xəstəliyi olan şəxslər daha yüksək risk daşıyırlar. Yaşın artması və siqaret çəkmək də risk amillərindəndir.
Yüksək təzyiqdən necə qorunmaq olar?
Mütəxəssislər duz qəbulunu azaltmağı, sağlam qidalanmağı, müntəzəm fiziki fəaliyyətlə məşğul olmağı və qan təzyiqini vaxtaşırı ölçməyi tövsiyə edirlər.
Qan təzyiqinin müxtəlif günlərdə təkrar ölçülməsi zamanı 140/90 mm civə sütunu və ya daha yüksək olması hipertoniya ehtimalını göstərir və həkim müayinəsi tələb edir.
Unutmayın: Yüksək təzyiq heç bir narahatlıq yaratmadan orqanizmə zərər verə bilər. Buna görə də xəstəliyin erkən aşkarlanmasında müntəzəm təzyiq ölçümü mühüm rol oynayır.
Kübra Musayeva
