ABŞ və İsrail İrana üçgünlük intensiv hücum planı hazırladı
ABŞ və İsrail hərbi qüvvələri noyabrın 3-də keçiriləcək ABŞ aralıq seçkilərindən sonra İrana qarşı yeni hərbi əməliyyatın keçirilməsi üçün konkret planlar hazırlayıb.
TodayPress TV Anadolu Agentliyinə istinadən məlumat verir ki, bu barədə The New York Times (NYT) nəşri ABŞ rəsmilərinə və müzakirələrdən məlumatlı mənbələrə istinadən məlumat yayıb.
Məlumata görə, təxminən üç gün davam etməsi nəzərdə tutulan intensiv hücum zamanı İranın nüvə obyektlərinin, enerji infrastrukturunun, raket və pilotsuz uçuş aparatları arsenalının hədəfə alınması nəzərdən keçirilir. ABŞ və İsrail hərbi qüvvələrinin mümkün əməliyyata hazırlıq çərçivəsində təlimləri də intensivləşdirdiyi bildirilir.
Nəşrin məlumatına əsasən, ABŞ rəsmilərinin bir qismi hesab edir ki, genişmiqyaslı zərbələr İran iqtisadiyyatına ciddi zərər vuraraq Tehranı diplomatik danışıqlarda güzəştlərə getməyə sövq edə bilər.
Bununla belə, ABŞ Prezidenti Donald Trampın hücum planını təsdiqlədiyi barədə məlumat yoxdur. Ağ Ev administrasiyası mümkün hərbi planlarla bağlı şərh verməkdən çəkinərək, İranın nüvə silahı əldə etməsinin qarşısını almaq üçün bütün variantların nəzərdən keçirildiyini bildirib.
İran tərəfi isə mümkün yeni hücumların qısa müddətdə başa çatacağı fikrini rədd edib. Tehran rəsmiləri cavab zərbələrinin daha geniş miqyas ala biləcəyini bildirərək, məlumat mərkəzləri və sualtı internet kabelləri də daxil olmaqla, rəqəmsal infrastruktura qarşı mümkün addımlarla bağlı xəbərdarlıq ediblər.
Beləliklə, ABŞ və İsrailin mümkün hərbi əməliyyatla bağlı hazırlıqları barədə məlumatlar regionda gərginliyin yenidən artması ehtimalını gündəmə gətirir. Lakin hücumun həyata keçirilməsi ilə bağlı yekun qərarın verildiyi təsdiqlənməyib.
