Yeni "iPhone" almağa ehtiyac yoxdur? Köhnə telefonun ömrü açıqlandı

"iPhone" telefonlarının real istifadə müddəti 5-7 il, bəzən isə daha çox ola bilər.

TodayPress TV xəbər verir ki, bu barədə “MakeUseOf” nəşri yazıb.

Məqalənin müəllifi Kristin Perso qeyd edib ki, yeni “Apple” modelinin təqdim olunması telefonu dəyişmək üçün əsas səbəb deyil. Əsas meyar köhnə cihazdan istifadəyə mane olan ciddi problemlərin yaranmasıdır.

Telefonun dəyişdirilməsinin vaxtının çatdığını müəyyən etmək üçün üç amilə diqqət yetirmək tövsiyə olunur: təhlükəsizlik yeniləmələrinin müntəzəmliyi, batareyanın hazırkı vəziyyəti və zəruri tətbiqlərlə uyğunluq.

Cihazın uzun müddət istifadəsinə mane olan əsas amillərdən biri batareyadır.

Vaxt keçdikcə onun tutumu azalır və smartfonu daha tez-tez enerji ilə doldurmaq lazım gəlir. “Apple” şirkətinin izahına görə, köhnəlmiş batareya telefonun qəfil sönməsinə və məhsuldarlığının məcburi şəkildə azaldılmasına səbəb ola bilər.

Şirkət, həmçinin köhnə əməliyyat sistemləri üçün ayrı-ayrı təhlükəsizlik düzəlişlərinin təqdim edilməsini tam dəstəklə eyniləşdirməməyi tövsiyə edir.

Telefonun dəyişdirilməsinin digər səbəbi proqram təminatının uyğunsuzluğudur. Tətbiq hazırlayan şirkətlər tədricən proqramların işləməsi üçün tələb olunan minimum iOS versiyasını yüksəldirlər.

Lazımi tətbiqlər işləmədikdə və köhnə cihazda əməliyyat sistemini yeniləmək mümkün olmadıqda, telefonun funksional imkanları ciddi şəkildə məhdudlaşır.

Aysel Mətləb