Sizi and verirəm Allaha, şəhidlərdən əl çəkin!
Jurnalist Səddam Laçın şəhidlərin adının mediada və sosial şəbəkələrdə sensasiya naminə hallandırılmasına etiraz edib.
TodayPress TV xəbər verir ki, onun sözlərinə görə, şəhidlərin yaxınlarının şəxsi həyatı və ya fərdi davranışları onların qəhrəmanlığı ilə əlaqələndirilməməlidir:
"Sizi and verirəm Allaha, şəhidlərdən əl çəkin. İmkan verin məzarlarında rahat uyusunlar. Hər fürsətdə onların adından, şəklindən istifadə etməyin. Onların saflığına, paklığına ləkə yaxmayın".
Jurnalist bildirib ki, şəhid ailələrinin üzvlərinin şəxsi seçimləri xəbər adı altında ictimailəşdirilməməlidir:
"Şəhid bacısı ərə gedib? Dəyməyin, qoy getsin, Allah xoşbəxt eləsin. Bunun xəbər yükü yoxdur. Paylaşmasanız da olar. Şəhid qardaşı toyda dava salıb? Yola verin, verə bilmirsizsə, polisə şikayət edin. Daha bunu manşetə çıxarıb "Toyda dava salan hansı şəhidimizin qardaşıdır?" yazmayın".
O vurğulayıb ki, cinayət və ya faciəvi hadisələr baş verdikdə də şəhidlərin xatirəsi sensasiya predmetinə çevrilməməlidir:
"Şəhid atası adam öldürüb? Öldürdüyü də şəhid oğlunun həyat yoldaşıdır? Kədərlənin. Atasız böyüməkdən qorxan uşaqların bir də anasız böyüyəcəklərini düşünün. Dəhşətə gəlin. Amma şəhidimizin şəkli ilə paylaşmayın".
Səddam Laçın media nümayəndələrinə və ictimaiyyətə müraciət edərək şəhidlərin adının yalnız onların Vətən uğrunda göstərdiyi qəhrəmanlıqla xatırlanmasının vacibliyini qeyd edib:
"Biz o oğlanı Vətən üçün gözünü qırpmadan canından keçib deyə sevirik, ona görə hər şeydən, hər kəsdən uca tuturuq. Onların adından bu qədər kortəbii istifadə etmək haqqımız yoxdur. Nə jurnalist kimi, nə vətəndaş kimi".
Türkan İsgəndərli
