Borcla qurban kəsmək olar? - AÇIQLAMA
Qurban bayramı yaxınlaşdıqca cəmiyyətdə ən çox müzakirə olunan məsələlərdən biri də imkanı məhdud insanların qurbanlıq və ya bayram üçün ət almaq məqsədilə borca girməsidir.
Bəzi şəxslər bunu dini vacib hesab etsə də, ilahiyyatçılar məsələyə daha fərqli yanaşırlar.
Mövzu ilə bağlı ilahiyyatçı Yaşar Qurbanov TodayPress TV-yə bildirib ki, İslam dinində qurban kəsmək yalnız maddi imkanı çatan şəxslər üçün nəzərdə tutulur və insanın özünü çətin vəziyyətə salması doğru hesab edilmir.
"İmkanı olmayan insan üçün qurban kəsmək vacib deyil. Borca girib qurban kəsmək də düzgün sayılmır, çünki sonra o borcu ödəmək məsuliyyəti yaranır. Bu yanaşma yalnız qurbanlıqla məhdudlaşmır. Sırf bayramda süfrə açmaq və ya ət almaq üçün də insanın özünü maddi yük altına salması tövsiyə olunmur. Eyni şəkildə, borca girib ət almaq da dinimizin tövsiyə etdiyi yanaşma deyil. Ümumiyyətlə, insan özünü maddi çətinliyə salacaq şəkildə borclanmamalı, özünə əziyyət verməməlidir".
İlahiyyatçı vurğulayıb ki, dinin əsas prinsiplərindən biri insanın gücü çatan qədər məsuliyyət daşımasıdır.
Onun fikrincə, bəzi hallarda insanlar cəmiyyət təzyiqi və ya "ayıb olar" düşüncəsi ilə borclansa da, bu addım sonradan daha ciddi maddi problemlərə səbəb ola bilər.
Qeyd edək ki, bu il Azərbaycanda Qurban bayramı 2026-cı ildə mayın 27-si və 28-nə təsadüf edir.
Türkan İsgəndərli
