Venesuela sərhədində hərbi HƏYƏCAN: ABŞ Xüsusi Təyinatlıları hərəkətə Keçdi!

ABŞ bu həftə Karib hövzəsinə xüsusi təyinatlı qüvvələr və hərbi yüklər göndərib. Nyu-Meksiko, Fort-Stüart və Fort-Kempbell bazalarından CV-22 Osprey və C-17 tipli təyyarələrlə hərbi heyət və avadanlıq Puerto-Rikoya çatdırılıb.   

Maraqlıdır, bu addım Venesuela yaxınlığında gərginliyi  daha da artıra və real müharibə şəraitinə gətirib çıxara bilərmi?  

Məsələ ilə bağlı TodayPress TV-yə danışan politoloq İlkin Məmmədkərimov bildirib ki, Maduro rejimi narkotik və silahlı qruplarla gəlir əldə edir:

"Venesuelada Maduro rejimi ticarət və narkotiklə məşğuldur. ABŞ və digər Latın Amerikası ölkələri bu narkotik vasitələrinin yayılmasından əziyyət çəkir. Maduro rejimi silahlı qruplaşmalar və narkotik kartelləri ilə əməkdaşlıq edərək gəlir əldə edir". 

O, qeyd edib ki, Tramp Maduro rejiminin ABŞ-yə təhlükə yaratmamasını tələb edir:

"Trampın tələbi odur ki, Maduro və rejimi amerikalıların kəndlərinə, şəhərlərinə zərər verə bilməz. ABŞ zərərlənməməlidir, çünki narkotik satışı və onun nəticəsində narkomaniyanın yayılması təhlükə yaradır. Bu səbəbdən ABŞ gəmilərə müdaxilə edir və zərərsizləşdirir".

Onun sözlərinə görə, hər keçən gün ABŞ-Venesuela müharibəsi riski artır. Hətta "NBC News" un məlumatına görə,  Birləşmiş Ştatlar Venesuelaya hərbi və enerji sahəsində hazırlıq aparır. Tramp isə deyir ki, ABŞ Maduro rejimini devirmək və silahlı qruplaşmaların fəaliyyətinə son qoymaq üçün addımlar atmağa hazırdır.

Analitik sonda əlavə edib ki, konkret olaraq Maduro rejiminin devrilməsi tələb edilir:

 "Latın Amerikasında narkomaniya yayılır və Maduro rejimi bu yolla varlanır. Tramp hökuməti isə öz vətəndaşlarını qorumaq, Amerika demokratiyasını müdafiə etmək məqsədilə bu vəziyyətə imkan verə bilməz. Eyni zamanda Venesuelada inflyasiya və işsizlik kritik səviyyədədir, xalq Maduro rejiminin getməsini istəyir. Tramp isə bildirir ki, Maduro ya istefa verməli, ya da güc yolu ilə devriləcək və bu, haqlı bir addımdır". 

Jalə Rövşən

TodayPress TV