Tehran seçim qarşısındadır: Uranın zənginləşdirilməsi müharibəyə aparır?

“İranın ABŞ və İsrailin birgə hücumları qarşısında durmaq, onlara layiq olduqları cavabı vermək imkanı yoxdur. Onlar bu reallığı dərk edib, verilən təklifləri qəbul edərək ölkə daxilində uranın zənginləşdirilməsindən imtina etsələr, bu, həm bölgənin maraqlarına cavab verərdi, həm də İran sakit yaşamaq imkanı əldə edə bilərdi”.

Politoloq Abutalıb Səmədov bunu TodayPress TV-yə şərh edərkən bildirib.

Onun sözlərinə görə İran ABŞ və Avropa ilə nüvə proqramı ilə əlaqədar uzun müddətdir ki, danışıqlar aparır:

“Həm ABŞ, həm də digər dövlətlər İrana uranın ölkə daxilində zənginləşdirilməsindən imtina etməyi təklif edirlər. Xaricdən zənginləşdirilmiş uran almağı, və yaxud bölgədə uranı zənginləşdirən dövlətlərin konsorsiumunun yaranmasını təklif edirlər. Ancaq İran bu təklifləri qəbul etmək niyyətində deyil”.

Analitik xatırladıb ki, İran daha əvvəl İsrail və ABŞ tərəfindən hava hücumlarına məruz qalıb, iri nüvə obyektləri bombalanıb və müəssisələrin xeyli hissəsi sıradan çıxarılıb. Onun fikrincə, ABŞ və İsrail Tehran güzəştə getmək istəmədiyi təqdirdə, yenidən bunkerəleyhinə bombalardan istifadə edərək İranda uranın zənginləşdirildiyi müəssisələri tamamilə sıradan çıxara bilərlər.

Politoloq, həmçinin müharibə ehtimalının yüksək olmadığını düşünərək izah edib ki, ABŞ-nin əsas məqsədi uranın zənginləşdirilməsinin qarşısını almaqdır və bunun üçün quru əməliyyatlarına ehtiyac yoxdur.

“Bu obyektləri havadan bunkerəleyhinə bombalarla sıradan çıxarmaq mümkündür. ABŞ də məhz bu yolu seçib və ehtimal ki, bundan sonra da eyni taktikanı davam etdirəcək”.

A.Səmədov sonda bildirib ki, İranın ABŞ və İsrailin birgə hücumları halında cavab verməsi mümkün görünmür.

Qeyd edək ki, Vaşinqton açıq şəkildə Tehranın nüvə və raket proqramları ilə bağlı mümkün addımlarının ABŞ-nin dəstəyi ilə İsrailin sərt hərbi cavabına səbəb ola biləcəyini bildirib.

ABŞ Prezidenti Donald Trampın xəbərdarlığından sonra İranın ali dini lideri Ayətullah Əli Xameneinin siyasi müşaviri Əli Şamxani Tehranın ona qarşı təcavüz halında cavab tədbirləri görəcəyinə əminlik verib.

Aysel Mətləb

TodayPress TV