"Tayvanın ümidləri Trampın zəifləməsinə bağlıdır"

Çin Ordusunun Şərq Zonası Döyüş Komandanlığı 30 dekabrda Tayvan yaxınlığında və dörd dəniz ərazisində canlı atəş təlimləri keçirəcək, icazəsiz gəmilərin və təyyarələrin təlim zonalarına girməməsi tövsiyə olunur.  Maraqlıdır,  Çin ordusunun Tayvan yaxınlığında hərbi təlimlər keçirməsi son baş verən hadisələr fonunda təbii qarşılanmalıdır. 

Məlumdur ki, Çin Ordusunun Tayvan yaxınlığında genişmiqyaslı hərbi təlimləri bölgədə geosiyasi gərginliyə necə təsir edə bilər, ABŞ və müttəfiqlərinin strateji qərarlarına hansı nəticələri gətirə bilər?

Sözügedən məsələ ilə bağlı TodayPress TV-yə danışan siyasi analitik Abutalıb Səmədov bildirib ki, Çin təlimləri ABŞ-nin  yeni strategiyası fonunda təbii qarşılanır:

"Amerika Birləşmiş Ştatları yeni milli təhlükəsizlik strategiyası qəbul edib və orada açıq şəkildə göstərilib ki, ABŞ-nin əsas təsir zonası Qərb yarımkürəsidir və digər bölgələrə aktiv müdaxilə etmək niyyətində deyil. Eyni zamanda, ABŞ digər bölgələrdə müəyyən dövlətlərin liderliyinin artmasına dəstək vermək arzusundadır".

Ekspert qeyd edib ki, ABŞ-nin  mövqeyi Çinin və Rusiyanın təsir imkanlarını artırır:

 "Bu vəziyyət təbii olaraq Çinin və Rusiyanın marağını artırıb və onlarda müəyyən ümidlər yaradıb ki, onlar yaxın əraziləri öz təsir zonalarına sala bilərlər. Digər tərəfdən, ABŞ-nin Venesuelaya qarşı atdığı addımlar, hərbi müdaxiləyə hazırlaşması və beynəlxalq hüquqla hesablaşmaması Çinin də maraqlarına uyğun gəlir. Tayvanın birləşdirilməsi istiqamətində Çinin planlarına mane olan əsas dövlət ABŞ idi və indiki mövqeyi Çinin arzularına cavab verir, ona yaxın zamanda vahid dövlət konsepsiyasını reallaşdırmaq imkanı yaradır".

Analitik əlavə edib ki, Tayvan ya siyasətini dəyişəcək, ya da yeni ABŞ administrasiyasını gözləyəcək:

"Təbii ki, Çinin keçirdiyi təlimlər və bundan sonra atacağı addımlar bölgədə müəyyən qədər gərginliyi artıracaq. Lakin əvvəlki illərdən fərqli olaraq, vəziyyət kəskin şəkildə dəyişməyəcək. Güman etmək olar ki, Tayvan reallıqları anlayaraq ya siyasətində müəyyən dəyişikliklərə gedəcək, ya da Trampın müddətinin başa çatmasını gözləyəcək və yeni administrasiya ilə əvvəlki xarici siyasət xəttini davam etdirəcək".

A.Səmədov sonda qeyd edib ki,Tayvanın ümidləri Trampın zəifləməsinə bağlıdır:

 "Digər ümidlər 2026-cı ildə keçiriləcək seçkilərlə bağlıdır. Seçkilərdə respublikaçıların məğlubiyyəti Trampın əl-qolunu müəyyən qədər bağlayacaq. Tayvanın bütün ümidləri Trampın zəifləməsi ilə bağlıdır. Əgər bu baş verməsə, Çinin Tayvanı birləşdirmək istiqamətində məqsədinə çatması o qədər də çətin olmayacaq". 

Jalə Rövşən