İsrail qarışdı: 30 min dindarın hərbi xidmət tələbi...Netanyahuya seçki təzyiqi

İsraildə daxili gərginlik artıb: Bnei-Brak yaxınlığında ultra-ortodoks haredilər saxlanılan kişilərin azad olunmasını tələb edərək yolu bağlayıb, polisə müdaxilə ediblər. Negev bölgəsində isə milli təhlükəsizlik naziri İtamar Ben-Qvir yerli etirazçılar tərəfindən daşlanıb. Hadisələr ölkədə hərbi xidmət və hökumət üzvlərinə qarşı ictimai narazılığın yüksəldiyini göstərir.  

Maraqlıdır,  İsraildə haredi etirazlarının artması ölkədə siyasi stabilliyə və hökumətin hərbi xidmət siyasətinə necə təsir göstərə bilər?   

Sözügedən məsələ ilə bağlı TodayPress TV-yə danışan politoloq Sədrəddin Soltan bildirib ki, Qanun layihəsi haredilərin hərbi xidmətə çağırılmasını nəzərdə tutur:

"Bu qanun layihəsi yeni deyil. Bu ilin payızında, noyabr ayında parlamentdə müzakirə edilib və zaman-zaman İsraildə hərbi xidmətə çağırışla bağlı yeni qanun layihəsi gündəliyə gətirilmişdir. Qanun layihəsinin mahiyyətində əsasən haredilərin hərbi xidmətə çağırılması nəzərdə tutulur".

Analitik qeyd edib ki, qanun layihəsi qəbul edilərsə, haredilər hərbi xidmətə çağırılacaqlar:

"Haredilər kimdir? Bunlar ortodoks yəhudilər, yəni dindar və ənənəçi adamlardır. Onlar dünyəvi aləmlə çox əlaqədə deyillər və Yəhudi Tövratına sadiqdirlər. Əvvəllər onları hərbi xidmətə çağırmayıblar. Son bir ildə onların da hərbi xidmətə çağırılması gündəliyə daxil edilib. Ehtimal olunur ki, qanun layihəsi qəbul ediləcəyi halda birinci dövrdə 30 mindən çox ortodoks yəhudi hərbi xidmətə çağırılacaq. Məqsəd İsrail əhalisinin hərbi müdafiə qabiliyyətini artırmaqdır. Bundan əlavə, koalisiya, yəni indiki hökumətə, Likud partiyasına qoşulmuş qüvvələr, qanun layihəsi qəbul edilməzsə koalisiyadan çıxmaqla hökumətə təzyiq göstərir".

S.Soltan sonda əlavə edib ki, qanun layihəsi İsraildə siyasi gərginliyi artırıb erkən seçkilərə təsir edə bilər:

"Hesab edirəm ki, İsraildə bu və digər oxşar məsələlərin həlli növbədənkənar parlament seçkilərindən sonra reallaşa bilər. Qanuna uyğun olaraq növbəti seçki payızda olmalıdır, amma etirazlar artarsa və koalisiyadakı tərəfdaşlar Binyamin Netanyahu hökumətinə təzyiqləri gücləndirərsə, Netanyahu erkən seçkilərə getmək müddətini qısalda bilər. Odur ki, hərbi xidmətə çağırışla bağlı yeni qanun layihəsi İsraildə siyasi kabinetin yenidən formalaşmasına və erkən seçkilərin keçirilməsinə təsir göstərə bilər". 

Jalə Rövşən

TodayPress TV