Çəmbər daralır: Yəmən, Suriya, Egey gərginliyi... - Ankara eyni anda 4 cəbhəyə çəkilir?

Türkiyə son dövrdə Yəmən, Suriya və Egey istiqamətində eyni vaxtda artan gərginliklə üz-üzədir.

Yəməndə husilərin Bab əl-Məndəb istiqamətində mövqelərini gücləndirməsi, Səudiyyə Ərəbistanının ABŞ-dən hərbi dəstək istəməsi və Vaşinqtonun bundan imtina etməsi bölgədə qarşıdurmanın genişlənməsi riskini artırır.

Husilərin strateji adalar və sahil xətti üzərində nəzarəti gücləndirməsi isə Qırmızı dənizdə gəmiçilik və enerji marşrutları üçün ciddi təhlükə yarada bilər.

Bu proseslərin fonunda Türkiyənin Yunanıstanla münasibətlərində də hərbi gərginlik artır. Kırklarelidə keçirilən tank təlimləri və Mitsotakisin Meis adasına mümkün səfəri Egey dənizində Ankara-Afina qarşıdurmasının yenidən gündəmə gəlməsindən xəbər verir.

Suriya istiqamətində türk dilinin təhsil proqramından çıxarılması barədə məlumat da Türkiyənin cənub sərhədində siyasi və sosial gərginliyin davam etdiyini göstərir.

İsrailin Türkiyəyə yönələn hərbi mesajları isə mənzərəni daha da mürəkkəbləşdirir.

İsrail Hərbi Dəniz Qüvvələri komandanının Türkiyənin fəaliyyətini izlədiklərini və buna uyğun hazırlaşdıqlarını bildirməsi, Netanyahunun Suriya və İranla bağlı açıqlamaları regionda qarşıdurmanın daha geniş təhlükəsizlik çərçivəsinə keçdiyini göstərir.

Beləliklə, Ankara eyni vaxtda Yəmən, Suriya, Egey və Şərqi Aralıq dənizində baş verən prosesləri nəzərə almalı olacaq. Türkiyənin bu münaqişələrə birbaşa cəlb olunmaması barədə səslənən fikirlər də təsadüfi deyil.

Əsas məsələ Ankaranın regional güc kimi mövqeyini qoruyaraq, Yaxın Şərqdə və Egeydə artan qarşıdurmaların Türkiyəyə birbaşa hərbi təhlükəyə çevrilməsinin qarşısını almaqdır.

Jalə Rövşən