Azərbaycan Tayvan mövqeyi ilə Pekinə dəstək verdi!

Azərbaycan Xarici İşlər Nazirliyinin mətbuat xidmətinin rəhbəri Ayxan Hacızadə Tayvan ətrafında yaranmış vəziyyətə münasibət bildirib. 

O qeyd edib ki, Azərbaycanın vahid Çin siyasəti ilə bağlı mövqeyi dəyişməz, aydın və ardıcıl xarakter daşıyır.

XİN rəsmisi bildirib ki, bölgədə sülh və sabitliyin qorunması beynəlxalq təhlükəsizlik üçün vacib amildir.

A.Hacızadə Azərbaycanın Tayvanın müstəqilliyini tanımadığını diqqətə çatdırıb:

"Mübahisəli məsələlərin beynəlxalq hüquq çərçivəsində, xüsusilə suverenlik və ərazi bütövlüyü prinsipləri əsasında, sülh yolu ilə nizamlanmasını dəstəkləyirik".

Maraqlıdır, Tayvan ətrafında gərginliyin artdığı bir mərhələdə Azərbaycanın bu mövqeyi Pekinlə münasibətlərin dərinləşdirilməsi baxımından hansı mesajı verir?

Mövzu ilə bağlı TodayPress TV-yə danışan dosent, siyasi elmlər üzrə fəlsəfə doktoru Əlimusa İbrahimov bildirib ki, Azərbaycanın Tayvanla bağlı mövqeyi prinsipial və beynəlxalq hüquqa əsaslanan yanaşmanın nəticəsidir:

“Azərbaycanın Tayvanla bağlı mövqeyi heç şübhəsiz ki, Çinlə münasibətlərin daha da inkişaf etdirilməsinə müsbət təsir göstərəcək. Lakin rəsmi Bakının bu mövqeyi yalnız Çinlə əlaqələri gücləndirmək məqsədi daşımır. Azərbaycan Çinlə münasibətlərin səviyyəsindən asılı olmayaraq Tayvanın bu ölkəyə məxsus olduğunu qəbul edir və bu mövqeyi açıq şəkildə ifadə etməkdən çəkinmir. Bu yanaşma ABŞ-nin sözügedən ərazi ilə bağlı mövqeyi ilə üst-üstə düşməsə belə, Azərbaycan öz prinsipial qərarına sadiq qalır”.

Analitik xatırladıb ki, Azərbaycanın bu məsələdə tutduğu mövqe tarixi ədalət və qarşılıqlı dəstək amili ilə də sıx bağlıdır:

“Torpaqlarımız işğal altında olduğu dövrdə Pekinin haqq və ədalətin yanında dayanmasını unutmamalıyıq. Çin dövləti sona qədər Qarabağın Azərbaycan torpağı olduğunu müdafiə edib və bu məsələdə daim Azərbaycanın yanında olub. Bu faktor da mövcud münasibətlərin dərinliyini göstərən mühüm məqamdır”.

Ə.İbrahimov vurğulayıb ki, Azərbaycanın mövqeyi yalnız Tayvan məsələsi ilə məhdudlaşmır:

“Azərbaycan Somalilendlə bağlı mövqeyini də açıq şəkildə ifadə edir. Bu, dövlət başçısının beynəlxalq hüquq normalarını hər şeydən üstün tutduğunun bariz nümunəsidir. Xarici siyasətdə ədalət prinsiplərinin əsas götürülməsi Azərbaycanın beynəlxalq nüfuzunun daha da artmasına xidmət edir”.

Ekspertin sözlərinə görə, bu yanaşma Çin tərəfindən də lazımi səviyyədə qiymətləndiriləcək:

“Şübhəsiz ki, Azərbaycanın bu prinsipial mövqeyi Çin dövləti tərəfindən müsbət qarşılanacaq və bunun nəticəsi olaraq ikitərəfli münasibətlərin daha da inkişafı üçün yeni imkanlar yaranacaq”.

Qiymət Mahir

TodayPress TV