Həkimdən çağırış: "Kişilər estetik müdaxiləli qadınlara həsrətlə baxanda..." - VİDEO
Son illər qadınlar arasında estetik əməliyyatlara maraq nəzərəçarpacaq dərəcədə artıb.
TodayPress TV xəbər verir ki, əvvəllər nadir hallarda rast gəlinən bu prosedurlara üz tutanların sayı həm paytaxtda, həm də bölgələrdə kifayət qədərdir.
Bəs bu kimi əməliyyatların artmasına səbəb nədir?
Mövzu ilə bağlı TodayPress TV-yə danışan terapevt Günay Lətifovanın sözlərinə görə, estetik əməliyyatlara üz tutanların əksəriyyəti daha çox estetik görünüş, özünəinam və sosial münasibətlərdə rahatlıq qazanmaq üçün bu addımı atırlar:
"Əslində, son illər gözəllik anlayışı dəyişib. Xanımlar təbii gözəllik əvəzinə öz gözəlliklərinə daha da gözəllik qatmağa çalışırlar. Bu gün plastik cərrahlara yaxınlaşan xanımların əksəriyyəti həddindən artıq böyük bədən ölçüləri istəyir. Həkimlər bunu müxtəlif səbəblər gətirərək rədd etsə də, pasiyentin şəxsi istəyi olduğu üçün bunu icra etmək məcburiyyətində qalırlar. Sonra da yaxşı görünməyəndə həkimin adı mənfi mənada hallanır".
Həkim hesab edir ki, xanımların bu kimi əməliyyatlara müraciət etməsinin əsl səbəbləri arasında şəxsi münasibətlərdə edilən səhvlər də var:
"Xanımların bir-birinə oxşamağa çalışmalarında sosial medianın təsirləri çoxdur. Onların həyat yoldaşlarının sosial mediada və ya real həyatda o tip əməliyyatlı xanımlara baxmaqları da xanımların bu qərarı verməsinə də səbəb olur. Kişi xanımına "sən də belə ol" demir, amma o tip xanımlara baxdıqda həyat yoldaşında bu təəssürat yaranır. Kişilərin əksəriyyəti yoldaşlarının çox da gözəl görünmələrini istəmirlər. Siz (kişiləri nəzərdə tutur - red.) başqasında onu görüb həsrətlə baxanda xanımınızı kompleksə salırsınız. O da elə düşünür ki, belə daha yaxşıdır, ona görə mənim yoldaşım və əksər kişilər baxır. Niyə mən özümə baxmayım?"
Sosioloq Hüseyn İbrahimov isə hesab edir ki, bu tendensiyanın əsas səbəblərindən biri cəmiyyətin gözəllik standartlarının dəyişməsi və sosial şəbəkələrin təsiridir:
"Hər hansı dövrdə insanlarda modaya qarşı meyllilik artır. Ancaq moda keçici bir məsələdir - hansısa dövrdə olur və keçir. Keçməyən məsələlər də var ki, bunlardan biri də məhz estetik əməliyyatlardır. Bu əməliyyatların artmasında insanların sosial media paylaşımlarının təsiri çoxdur. Cəmiyyət arasında tanınan müğənnilər və digər məşhurlar da estetik əməliyyatlardan sonra öz yeni gözəlliklərini paylaşaraq bu əməliyyatları təbliğ edirlər. Mənə elə gəlir ki, cəmiyyətdə müəyyən mövqe tutan şəxslər bu əməliyyatları etdikdən sonra onu xüsusi ictimai təbliğat vasitəsinə çevirməməlidirlər. İctimai rəydə formalaşan gözəllik anlayışı da insanları plastik əməliyyata daha çox yönləndirir".
Daha ətraflı TodayPress TV-nin süjetində:
Ziyafət Əlisoy
FOTOLAR
